اسلام آباد۔ 20 دسمبر (اے پی پی) وزیرخارجہ مخدوم شاہ محمود قریشی پارینے کہ 20 وزراء خارجہ و 10 نائب وزراء خارجہ نا او آئی سی وزراء خارجہ کونسل نا اہم انگا دیوان اٹی بشخ ہلنگ پاکستان نا بھلو سرسہبی اسے، 437 ڈل پاکستان اٹ اڈ ہلوک دا تاریخی دیوان اٹ بشخ ہلکر، دوشنبے نادے آ او آئی سی وزراء خارجہ کونسل نا اہم انگا دیوان نا بابت اہم بیان اسے ٹی وزیرخارجہ پارے کہ اللہ تعالیٰ پاکستان ءِ وزیراعظم عمران خان نا کماشی ٹی سرسہب کرے و ملک ءِ شرفمندی و سرسہبی عطاکرے۔ وزیرخارجہ پارے کہ اوغانستان کن ٹرسٹ فنڈ انا ٹہیفنگ اٹ سرسہب مسن و اوغانستان نا بینکنگ سسٹم نا بحالی نا بابت قرارداد ایسن، دابھاز بھلو پیش رفت اسے، شاہ محمود قریشی پارے کہ پاکستان و سعودی عرب اواری اٹ کڑد ادا کریر۔ وزیرخارجہ دفترخارجہ تون کمک کروک آ غٹ ادارہ و اوفتا تعلقدار شخصیت آتا منت واری ءِ ہرفے و پارے کہ ویل طالبان تا اف، ویل 38 ملین اوغان الس نا ءِ، اوغان الس بین و قحط تون مون تننگ ءُ، اوغانستان ءِ دوائی، خور انا دمدستی گرج ءِ، تنخواہ تننگ کن پیسہ مریک تو اسکول آک ہم چلینگرہ، داخہ در ملک آتا نمائندہ غاتا پاکستان آ بننگ بھاز بھلو پیش رفت اسے۔ وزیرخارجہ پارے کہ اسپیکر قومی اسمبلی ، سینیٹ و پاکستان نا فوج انا منت واری ءِ ہرفیوہ۔ دفترخارجہ نا عملہ خواری کرسا کانفرنس ءِ سرسہب کرے، پاکستان و درملکی میڈیا ہرافک دا بھاز اہم انگا و تاریخی دیوان ءِ رپورٹ کریر تاہم منت وار اُن، دعا ءِ کہ اللہ تعالیٰ پاکستان ءِ اقوام عالم اٹ مدام سرسہب تخے۔
