اسلام آباد۔ 20 دسمبر (اے پی پی) اسلامی کمکار تنظیم(او آئی سی) نا سیکرٹری جنرل حسین ابراہیم طٰحہ اسلام آباد بالی پٹ آن روانہ مس، کانفرنس نا سرسہب اڈتننگ آ پاکستان نا الس و حکومت نا منت واری ءِ ہرفے۔ وزیر مملکت حوالکاری فرخ حبیب و وزیر مملکت پارلیمانی امور علی محمد خان مہمان تے سپارا۔ انڈونیشیا، اردن، کرغزستان، قازقستان ، بنگلہ دیش و سرالیون نا ڈل آک ہم روانہ مسر۔ اوآئی سی نا سیکرٹری جنرل روانگی آن مست میڈیا تون گپ وتران کرسا پارے کہ کانفرنس نا سرسہب اڈتننگ آ پاکستان نا الس و حکومت نا منت وار اُٹ۔ اوپارے کہ درو نا کانفرنس سرسہب مس ہرااسہ ستاکڑزوک ءُ ہیت اسے۔ سیکرٹری جنرل او آئی سی پارے کہ دیوان آن ڈیہہ خاص وڑاٹ اوغانستان اٹی انسانی حالیت آتیٹی گچینی بریک، او آئی سی دیوان اٹ فیصلہ کننگاکہ اوغانستان کن نمائندہ خصوصی تعینات کننگے و درو نمائندہ خصوصی اوغان ڈل اتون ہم اوڑدہی کرینے۔ اوپارے کہ دیوان نا اسہ پین سرسہبی اس اوغانستان نا مخلوق کن فنڈ انا قیام ءِ۔ وزیر مملکت حوالکاری و شینکاری فرخ حبیب پارے کہ پاکستان بننگ آ سیکرٹری جنرل او آئی سی نا منت وار اُن، اوغانستان اٹ انسانی المیہ ودی مسنے ۔ وزیر مملکت پارے کہ داالمیہ نا توننگ کن او آئی سی نا پلیٹ فارم آن پبی توار بڑز کننگا۔ اوپارے کہ مچ آ دنیا ءِ او آئی سی نا پلیٹ فارم آن پبی ءُ کلہو اس ہنانے۔ فرخ حبیب پارے کہ اومیت ءِ کہ اوغانستان نا نمائندہ خصوصی اوغان الس کن فعال کڑد اس ادا کیک و داکانفرنس اٹی مروک آ فیصلہ غاتیا ہم عملدرآمد کرفنہ۔ وزیر مملکت پارے کہ او آئی سی نا دا بھاز اہم انگا دیوان نا مثبت بھرم مون آ بریک۔
