وزیراعظم نا حاجی تے زیات آن زیات آسراتی تا فراوانی، حج خڑچ آتا اول سرآن جاچ ئِ ہلنگ و نظرثانی مروک خڑچ آتے بروک آ دیوان اٹی پیش کننگ ناپارت
ہنکینی آسراتی تا بارواٹی سرجم ڈٹ اس وضع کننگ کن کابینہ نا ذیلی کمیٹی قائم
اسلام آباد۔ 12اپریل (اے پی پی) بنجائی کابینہ حج پالیسی 2017 ءو پوسکن آ گیس کنکشن آتیا خلوک پابندی ئِ ہرفنگ نا منظوری تسنے وخت اس کہ ہنکینی آسراتی تا بابت سرجم ڈٹ اس وضع کننگ کن کابینہ نا ذیلی کمیٹی اس اڈ تس۔ بنجائی کابینہ نا دیوان چارشنبے نا دے وزیراعظم محمد نواز شریف نا کماشی ٹی وزیراعظم ہاﺅس اٹی اڈ ہلک۔ وزیراعظم حاجی تے زیات آن زیات آسراتی تا فراوانی نا پارت کرے۔ اوگدرینگوک آسال گچین حج بست و بند آتیا وزارت مذہبی امور نا کوشست آتا ستائِ کرے۔ اوحج خڑچ آتا اول سر آن جاچ ئِ ہلنگ و نظرثانی مروک خڑچ آتے بروک آ کابینہ دیوان اٹی پیش کننگ نا پارت ہم کرے۔ دیوان اٹی بنجائی وزیر ڈٹ بندی و شونداری احسن اقبال ہاﺅسنگ نا بشخ انا بارواٹی بریفنگ تس ۔ وزیراعظم پارے کہ حکومت ہنکینی آسراتی تا بابت نیزگار تپہ ئِ آسراتی فراوان کننگ نا خواہندار ئِ۔ اوپارے کہ شونداری سرجزآتا سوب آن شاری آبادی ٹی ترندی اٹ ودکی مننگ ئِ ہنداخاطران ننے مچ آ ملک اٹی ہنکینی گرج آتے پورو کروئی ئِ۔ وزیر ڈٹ بندی کم و متوسط کٹیا کروک آ تپہ غاتے کن ہنکینی ماڈل اس پیش کرے۔ اوہاﺅسنگ نا بشخ انا بابت گورننس و مالیاتی امور، ڈٹ بندی، ڈغار و ہنکین ، قدرتی آفت آتیان بچنگ و چاگڑدی بدلی تا زئم تابابت معاملہ غاتیا بریفنگ تس ۔ کابینہ وزیر ہاﺅسنگ و تعمیرات نا سروکی ٹی کابینہ نا ذیلی کمیٹی اس اڈ تس ہرا 10 دے انا تہٹی سرجم ڈٹ اس وضع کرسا کابینہ نا بروک آ دیوان اٹی پیش کیک۔ ذیلی کمیٹی نا ایلو باسک آتیٹی وزیر ڈٹ بندی ، وزیر ریلوے ، وزیر سیفران ، وزیراعظم نا سیکرٹری ، سیکرٹری خزانہ، سٹیٹ بینک و نیشنل بینک انا نمائندہ غاک اوار مریرہ۔ کابینہ توانائی نا بارواٹی کابینہ کمیٹی نا سفارش آ گیس کنکشن آتیا خلوک پابندی ئِ ہرفنگ نا ہم منظوری ئِ تس۔ دیوان اٹی ساڑی حکومت اٹی گیس انا شونداری اسکیم تیا عملدرآمد نا ہم منظوری تننگا، کابینہ قومی ہیلتھ سروسز ریگولیشن و کوآرڈینیشن ڈویژن نا کنڈآن سلاہ ئی بارکوڈنگ قواعد نا ہم منظوری ئِ تس۔ کابینہ پاکستان نا محکمہ موسمیات و سلطان قابوس یونیورسٹی اومان نا نیام اٹ سونامی پیشگی احوالی نظام نا بابت تکنیکی کمک، پاکستان محکمہ موسمیات و فرانس نا محکمہ موسمیات نا نیام اٹ موسمیاتی بشخ اٹی کمکاری نا منظوری ئِ تس۔ کابینہ کینیا وپاکستان نا نیام اٹ دفاعی کمک نا بارواٹی ایم او یو نا مسودہ غا ہیت وگپ نا اصولی منظوری ئِ تس۔ نیشنل ڈیفنس یونیورسٹی و جنیوا سنٹر فار سیکورٹی پالیسی سوئٹزر لینڈ نا نیام اٹ پٹ وپول و کمکاری سرجزآتا بشخ اٹی سٹیٹمنٹ آف انٹینٹ آ دستخط، جمہوریہ چیک انا وزارت دفاع و پاکستان نا وزارت دفاعی پیداوار نا نیام اٹ دفاعی صنعت و لاجسٹک نا بشخ اٹی کمک نا بابت ایم او یو نا مسودہ غا ہیت و گپ نا بناءکننگ نا ہم منظوری ئِ تننگا ۔ کابینہ دیوان اٹی پاکستان و کیوبا نا نیام اٹ سفارتی ، سرکاری و سروس پاسپورٹ تخوک آتے کن ویزہ استثنیٰ نا بارواٹی ہیت وگپ نا بنائِ کننگ نا ہم اصولی منظوری ئِ تننگا۔ وزارت داخلہ و ناروے نا وزارت انصاف و پبلک سکیورٹی نا نیام اٹ انسداد ڈوہ انا بشخ اٹی کمک نا بارواٹی ہیت وگپ نا بناءکننگ نا ہم منظوری ئِ تننگا۔ کابینہ پاکستان و اردن نا نیام اٹ سفارتی، سرکاری و سروس پاسپورٹ تخوک آتے کن ویزہ استثنیٰ نا بارواٹی ہیت وگپ نا مسودہ غا دستخط نا منظوری ئِ تس۔ پاکستان و بلغاریہ نا نیام اٹ سفارتی ، سرکاری و سروس پاسپورٹ تخوک آتے کن ویزہ استثنیٰ نامعاہدہ غا دستخط نا ہم منظوری ئِ تننگا۔ قومی احتساب بیورو و چین نا وزارت چاروکی نا نیام اٹ انسداد بدعنوانی نا بشخ اٹی کمکاری ئِ سوگوی تننگ کن مفاہمت نا یات داشت آتے ہم پک کننگا۔ کابینہ تھائی لینڈ تون کشاری کمک نا بارواٹی کاﺅنٹر ڈرافٹ ایم او یو آ ہیت وگپ نا بناءکننگ و ہِننگ و بننگ نا اصولی منظوری ئِ تس۔ دیوان اٹی رائل کینیڈین ماﺅنٹڈ پولیس و اینٹی نارکوٹکس فورس انا نیام اٹ منشیات نا بابت ڈوہ تا توننگ کن نظام اس وضع کننگ نا بارواٹی کمکاری نا یات داشت آتیا ہیت وگپ نا بناءنا اصولی منظوری ئِ تننگا۔ کابینہ پاکستان و سری لنکا نا نیام اٹ جان جوڑی و طب انا بشخ اٹی ایم او یو آ دستخط ئِ ہم پک کرے۔ کابینہ ہیلتھ سروسز، میڈیکل ایجوکیشن ، ریسرچ ، ڈرگ و میڈیکل ٹیکنالوجی نا بشخ اٹی تین پہ تینی کمکاری کن ایران وپاکستان نا نیام اٹ ایم او یو آ دستخط ئِ ہم پک کرے۔ کابینہ 13فروری 2017، 22 فروری 2017، 28 مارچ 2017ء، آ کابینہ نا اقتصادی رابطہ کمیٹی نا اڈ ہلوک آ دیوان تیٹی کروک آ فیصلہ غاتے ہم پک کرے۔ کابینہ 22 مارچ 2017ءو 10 اپریل 2017 ءآ کانودی کیس آتے چٹفنگ کن کابینہ کمیٹی نا سفارشات آتے ہم پک کرے۔
