اسلام آباد۔ 11اپریل (اے پی پی) وزیراعظم نا خصوصی کمکار خارجہ امور طارق فاطمی پارینے کہ پاکستان و ہنگری نا نیام اٹ واپاری و اقتصادی بشخ آتیٹی تعلقداری تے پین سوگو کننگ نا گرج ئِ۔ دفترخارجہ نا ترجمان نا رداٹ دا ہیت ئِ او ہنگری نا نائب سیکرٹری خارجہ وواپار سلوسٹر بس اتون ہیت وگپ کرسا پارے ہراسے شنبے نا دے دفترخارجہ ٹی اوڑتون اوڑدہی کریر۔ خصوصی کمکار ہڑتوم آ ملک آتا نیام اٹ جم اٹنگا ہڑتوم آ کنڈآتا تعلقداری تا حالیت آتیا است جمی نا درشانی ئِ کریر، ولے او واپاری و اقتصادی بشخ آتیٹی تعلقداری تے پین سوگو کننگ نا گرج آ زور شاغار ۔ طارق فاطمی اودے سیکورٹی و انسداد دہشت گردی نا بشخ آتیان بیدس اقتصادی شونداری و جمہوری ادارہ غاتے سوگو کننگ اٹی پاکستان نا سرسہبی تا بابت بریف کرے۔ سلوسٹر بس داوخت آ پارے کہ ہنگری پاکستان تون تعلقداری تے بھاز اہمیت ایتک۔ ہڑتوم آ ملک آتا نیام اٹ ہڑتوم آ کنڈآتا واپاری کچ اٹی ودکی نا لائخی ساڑی ئِ۔ اوپارے کہ ہنگری نا کمپنی ’مول‘ پاکستان اٹی تیل و گیس انا بشخ اٹی زرکاری کننگ ئِ۔ ہنگری پاکستانی طالب علم آتے کن اسکالر شپ ناکچ ئِ 80 آن ودفسا 200 کرینے۔
