اسلام آباد۔ 11اپریل (اے پی پی) صدر مملکت ممنون حسین اسلامی کمکار تنظیم (او آئی سی ) آ زورشاغانے کہ او مسلم دنیا نا بابت دیرینہ جھیڑہ غاک فلسطین و جموں و کشمیر نا ایسری کن یکجان مرسا فعال کڑد ادا کیک، داہڑتوم آک ننااست انا بھاز خڑک ئُ و ننا پدریسہ چکار نا متقاضی ئُ۔ او او آئی سی نا سیکرٹری جنرل ڈاکٹر یوسف احمد تون ہیت وگپ کریکہ ہرا ک سے شنبے نا دے داڑے اسہ ڈل اسے تون اوار اوڑتون اوڑدہی کریر۔ صدر مملکت اونا اولیکو دورہ پاکستان آخیرمقدم ئِ کرسا او آئی سی و اسلامی ملک آتا کنڈآن مقبوضہ جموں و کشمیر نا الس نا حق خودارادیت ئِ حقیقت نا روپ تننگ نا چرجوئی ٹی یکجہتی نا درشانی نا ستائِ کرے۔ اواو آئی سی نا کنڈآن تینا خصوصی نمائندہ جموں و کشمیر نا مقبوضہ کشمیر نا دورہ کن بھارتی حکومت آن آسراتی فراوان کننگ نا گرج آتا بارواٹی ساڑی آ گام تا ستائِ کرے۔ صدر مملکت پارے کہ او آئی سی نا آجو و آخبتی کمیشن انسانی حق انا ڈل انا گدرینگوک آ تُو آزاد جموں و کشمیر و لین آف کنٹرول نا دورہ اہم ئس و اومیت ئِ کہ اونا رپورٹ بھاز معتبر و قابل قبول مریک۔ اوسیکرٹری جنرل آ زور شاغا کہ دا رپورٹ غٹ باسک ملک ، دنیا نا اہم دارالحکومت و تعلقدار اہم جہانی باسک آتسکان رسیفنگے تانکہ کشمیری الس نا مصائب و اوفتا حق خودارادیت آن پدریسہ نہ من ئِ تالان کننگ مرے۔ صدر ممنون حسین پارے کہ دہشت گردی اسہ بھلو جہانی ئُ خلیس اسے ولے بدقسمتی اٹ داڑآن غٹ آن زیات مسلمانک زہمی مننگ ئُ۔ او آئی سی نا پلیٹ فارم ئِ انتہاپسندی و دہشت گردی نا برخلاف بیانیہ تننگ کن بایدے کاریم اٹ اتنگے انتئے کہ او آئی سی آن بروک آ بیانیہ امہ ٹی بھاز ساکھ و قبولیت نا حامل مریک۔ داوخت آ ڈاکٹر یوسف احمد پارے کہ کشمیر نا جھیڑہ نا ایجنڈا او آئی سی نا سرفہرست ئِ۔ اومقبوضہ کشمیر اٹی جاری بنداوی انسانی حق انا خلاف ورزی و بھارتی سیکورٹی فورس آتا کنڈآن بے گناہ انسان آتون غیر انسانی سلوک آ بھاز گڑتی نا درشانی ئِ کرے۔ اوپارے کہ او آئی سی و فلسطین نا جھیڑہ غاتا ہموڑے الس نا است خواہی تار داٹ منصفانہ ایسری کن تینا کڑدئِ ادا کرسا کیک۔ اوپارے کہ پاکستان مسلم لیگ دنیا نا اہم و سرکڑدہ باسک اسے ودہشت گردی نا لعنت نا چٹفنگ کن اونا کوشست آک ستاءکڑزرہ۔ اوپارے کہ او مچ آ دنیا ٹی مسلمان تے مون تروک ویل آتے اواری اٹ ایسر کننگ نا چرجوئی ٹی مسلم امہ نا سیوتئِ پین سوگو جوڑ کننگ کن کاریم کیک۔
