بھارت تون کشمیرنا جھیڑہ نا ایسری ٹی امریکہ کلیدی کڑد ادا کننگ کیک اومیت ئِ پوسکن آ امریکی اتنظامیہ کشمیر نا ویل انا ایسری ٹی کمکاری کن تینا فعال کڑد ئِ ادا کیک
سلامتی کونسل تینا قرارداد آتیا عملدرآمد ئِ بایدے المی جوڑ کے، امریکہ غان امداد آخا، واپار نا خواہندار اُن، پاکستان امریکہ تون اوار غٹ ملک آتون تین پہ تینی شرف آ مبنی خوشگوار تعلقداری تا خواہندار ئِ، پاکستان درملکی زرکاری کن اسہ پرکشش ئُ ہند اس جوڑ مسنے، پاکستان ایلو ملک آتا”سی پیک“ اٹی اوار مننگ نا خیرمقدم ئِ کیک
حکومت ملک انا شونداری و شونہالی و لس بندغ نا شرحالی ئِ المی جوڑ کننگ نا اسہ ٹکی ایجنڈا غا عمل کننگ ئِ، گڑاس عنصر دانا کسر اٹی ہروڑنا اڑاند ودی کننگ نا کوشست کننگ ئُ، اللہ تعالیٰ نا فضل وکرم اٹ مچ آ قوم نن تون تفوک ئِ
سمندر پار پاکستانیک قوم انا نہادی میرات آک ئُ، او لمہ وطن نا شونداری و شرحالی ٹی تینا مناسب کڑد ئِ ادا کیر
اسلام آباد۔ 11اپریل (اے پی پی) وزیراعظم محمد نواز شریف کشمیر نا جھیڑہ نا ایسری ٹی امریکہ نا کلیدی کڑد انا اہمیت ئِ تالان کرسا اومیت ظاہر کرینے کہ صدر ڈونلڈ ٹرمپ نا سروکی ٹی پوسکن آ امریکی انتظامیہ پاکستان و بھارت نا نیام اٹ دیرینہ کشمیر نا جھیڑہ نا ایسری ٹی کمکاری کن تینا فعال کڑد ئِ ادا کیک ہرا سویلی ایشیاءنا ڈیہہ ٹی امن نا کسراٹی غٹ آن بھلا اڑاند ئِ۔ او داہیتئِ ”اے پی پی“ نا خصوصی نمائندہ زاہد حمیدی ئِ داڑے وزیراعظم ہاﺅس اٹی خصوصی انٹر ویو ترسا پارے۔ وزیراعظم پارے کہ کشمیر نا بابت امریکہ بھاز اہم ئُ کڑد اس ادا کننگ کیک ہرادے اوداوخت اسکان ادا کتنے۔ اوپارے کہ امریکہ تون اوار مچ آ دنیا دا جھیڑہ نا سوب جہانی امن و ڈیہہ ٹی سوگوی ئِ لاحق خلیس آتیان معلومدار ئُ۔ اوپارے کہ نن تنازعہ کشمیر نا ایسری نا بابت پیش رفت ہُننگ نا خواہندار اُن ہرا ڈیہہ ٹی امن و شونداری نا کسر اٹی غٹ آن بھلا اڑاند ئِ و امریکہ تون اوار مچ آ دنیا داحقیقت آن جوانی اٹ واقف ئِ۔ یات سلے کہ صدر ٹرمپ تینا گچین کاری مہم اٹی سویلی ایشیاءٹی امن و سلامتی نا ویل ئِ ایسر کننگ اٹی کمک کننگ نا خواہش نا درشانی ئِ کریسس و اوکان پد اونا نائب صدر مائیک پنسی و ہنداتُو اقوام متحدہ ٹی امریکہ نا سفیر نکی ہیلی ہم ہنداوڑنا خیال آتا درشانی ئِ کرسا پارے کہ ٹرمپ انتظامیہ بھارت وپاکستان نا نیام اٹ تعلقداری تا بارواٹی فکرمند ئُ۔ نکی ہیلی داہم سلاہ تسوسس کہ صدر ڈونلڈ ٹرمپ بھارت وپاکستان نا نیام اٹ بے چیٹی ٹی کمتی نا عمل اٹی ہم اوار مننگ کیک وخت اس کہ ایلو کنڈآ پاکستان نا پاننگ ئِ کہ او دیرینہ کشمیر نا ویل انا ایسری ٹی کمکاری نا بابت چندی ملک آتا کنڈآن ثالثی کوشست آتا ہمیشہ خیرمقدم ئِ کرینے۔ وزیراعظم محمد نواز شریف کشمیر نا بارواٹی اقوام متحدہ نا سلامتی کونسل نا قرارداد نا حوالہ ئِ ترسا پارے کہ سلامتی کونسل تینا قرارداد آتیا عملدرآمد ئِ المی جوڑ کے۔ دُن مفننگ آن مست ہی اونا ساکھ انا بارواٹی چندی سوج آک ہرفنگ انگ ئُ۔ پاک امریکہ تعلقداری تا بارواٹی وزیراعظم محمد نواز شریف پارے کہ ہڑتوم آ ملک آک ہڑتوم آ کنڈآتا تعلقداری تا مریس تاریخ اسے نا حامل ئُ۔ اواومیت ظاہر کرے کہ صدر ڈونلڈ ٹرمپ نادوراٹی ہڑتوم آ ملک آتا نیام اٹ کثیر الجہتی تعلقداریک پین گچین مریرہ۔ اوپارے کہ نن امریکہ غان امداد آخا، واپار نا خواہندار اُن و پاکستان امریکہ تون اوار غٹ ملک آتون تین پہ تینی شرف آ مبنی خوشگوار تعلقداری تا خواہندار ئِ۔ اوپارے کہ ساڑی حکومت نا کنڈآن گیشتر اقتصادی اصلاحات و پرکشش آسراتی تیٹی پاکستان درملکی زرکاری کن اسہ پرکشش ئُ ہند اس جوڑ مسنے ۔ وزیراعظم پارے کہ مچ آ دنیا آن کاروباری ادارہ غاک چندی بشخ آتیٹی است خواہی ظاہر کننگ ئُ وخت اس کہ ملک اٹی مست آن کاروبار کروک آ درملکی کمپنیک تینا زرکاری آ جوان ئُ فائدہ اس کٹیا کننگ ئُ۔ پاک چین اقتصادی راہداری نا رداٹ بھلا بھلا ڈٹ جاٹ آتا حوالہ ئِ ترسا وزیراعظم پارے کہ سی پیک مچ آ ڈیہہ ٹی اقتصادی سرجز ودی کننگ و اوفتا مون آ دننگ نا بھاز زیات لائخی تخک۔ پاکستان ایلو ملک آتا کنڈآن دا شاندار ڈٹ اٹی اوار مننگ و ارب آ ڈالر مالیت نا زرکاری نا فائدہ غاتیان فائدہ ہرفنگ نا خیرمقدم ئِ کیک۔ وزیراعظم امریکی کمپنی تیا ہم زور شاغا کہ او پوسکن آ وارخواہی تیان فائدہ ہرفر و پاکستان اٹی زرکاری کیر ہراڑے غٹ اکن سودمند زرکار دوست چاگڑد اس ساڑی ارے۔ اسہ سوج اسے نا ورندی ٹی وزیراعظم نواز شریف پارے کہ اونا حکومت ملک انا شونداری و شونہالی و لس بندغ نا شرحالی ئِ المی جوڑ کننگ نا اسہ ٹکی ایجنڈا غاعمل کننگ ئِ و ننا غٹ تر کوشست آک دا ایجنڈا نا دوئی آ تخوک ئُ۔ ولے اوداہیت آ ہست ہسونی نا درشانی ئِ کرے کہ گڑاس عنصر خواپسہ کہ لس بندغ نا حالیت ئِ گچین جوڑ کننگ کن ساڑی حکومت نا کوشست آک سرسہب مریر و او دانا کسر اٹی ہروڑنا اڑاند ودی کننگ نا کوشست کننگ ئُ۔ وزیراعظم پارے کہ اللہ تعالیٰ نا فضل و کرم اٹ مچ آ قوم نن تون تفوک ئِ و نن نئے بیرہ دا اڑاند آتا مون ئِ تورینہ بلکن شونداری و شونہالی نا شاہراہ آ تینا سفر ئِ پین ترند کینہ۔ اسہ پین سوج اسے نا ورندی ٹی وزیراعظم سمندر پار پاکستانی تے قوم انا نہادی میرات گوندسا اوفتیان خواست کرے کہ او لمہ وطن نا شونداری و شرحالی ٹی تینا مناسب کڑد ئِ ادا کیر و ملک ئِ پوسکن آ بڑزی تیان روشناس کننگ کن کروک آ کوشست آتیٹی حکومت نا دُو ئِ سبک کیر۔
