اسلام آباد۔ 09 دسمبر (اے پی پی) وزیرخارجہ مخدوم شاہ محمود قریشی پارینے کہ ڈیہہ و دنیا ٹی امن، شونداری و شونہالی نا اسیجائی ہدف آتا دوئی کننگ کن نن اجتماعیت تخوک جہانی نظام (گلوبل آرڈر) نا مخ تفی ءِ برجاتخنہ۔ سارکءِ تنگ نظر سیاسی ایجنڈاغاتیان آجو کرسا زندہ و فعال کننگ نا گرج ءِ۔ پاکستان پاکستان جہانی یا علاقائی جھیڑہ سے نا بشخ مفننگ نا فیصلہ کرینے۔ پنچ شنبے نادے آ داڑے آئی ایس ایس آئی نا کنڈآن ’’پرامن و شونہال سویلی ایشیا‘‘ نا سرحال آن اسلام آباد کانکلیو، آن تران کرسا پارے کہ ننا دنیا بدل مننگءِ۔ کثیر القومیت نا نظریہ ءِ تنہائی پسندی یا اسہ کنڈی سوچ انا واکداریک پرغنگ ءُ۔ ملک آک قوم پرستانہ ایجنڈا غاتا کنڈآ پدی بننگ ءُ۔ واک انا اظہار اسہ پوسکن ءُ معمول اس جوڑ مرسا کننگ ءِ۔ بھلا واکدار آتا نیام اٹ مقابلہ و کشمکش ودسا ہِننگ ءِ ہرا تصادم نا کنڈآ چکنگ ءِ۔ دانا نتیجہ غاتیٹی پوسکن آ مخالفت و قابت ودی مننگ کیک و دنیا ءِ ولدا آن’دھڑ‘آتا سیاست نا گواچی کننگ ءِ۔ پاکستان کراچی و گوادر بندرگاہ تا کمک اٹ چین نا دیکی بشخ و نیامی ایشیائی جمہوریت آتا جہانی سمندر اسکان رسینگ نا گونڈ ءُ کسر اس فراوان کیک۔ پاکستان وچین نا سدا بہار سٹریٹجک کوآپریٹو شریداری نا طرہ امتیاز ، چین پاکستان اقتصادی راہداری(سی پیک) رابطہ غاتا استواری نا اسہ جوان و بے مٹ ءُ ڈٹ اسے۔ اوپارے کہ پاکستان نا زرگزرانی بدلی اتون اوار اوار ’سی پیک‘ ڈیہہ ءِ گنڈنگ کن ہم اسہ اہم ءُ کسر اسے۔ سویلی ایشیا نا شونہالی کن ڈیہہ ٹی علاقائی کمک المی ءِ۔ سارک ءِ تنگ نظرسیاسی ایجنڈا غاتیان آجو کرسا زندہ و فعال کننگ نا گرج ءِ۔ بدبختی اٹ ڈیہہ نا تہہ ٹی واپار بھاز کم ءِ، واپار، شاہراتی نظام و رابطہ غاتیٹی بروک اڑاند و پابندی تے مر کننگ کن پبی گام گیج کننگ نا گرج ءِ۔ وزیرخارجہ پارے کہ پاکستان جہانی یا علاقائی جھیڑہ غاتا بشخ مفننگ نا فیصلہ کرینے و بیرہ امن و شونداری ٹی شریک مننگ نا کسر ءِ گچین کرینے۔ پاکستان اجتماعیت و کمکاری نا حامل سوچ و فکر آ مبنی گیشتر زرگزرانی و اقتصادی شریداری آ زور شاغنگ ءِ۔ بھازانگا ایلو ملک آتیانبار پاکستان ءِ زرگزرانی سٹرکچرل سوب آتیان ودی مروک آ بھاز انگا غیر روایتی سیکورٹی ویل مون تروک ءِ ہرافتے ٹی چاگڑدی تغیر، غذا، توانائی و آبی تنکی، آبادی ٹی ودکی، بے محابہ شار تا ودنگ و نیزگاری کون آ ویل آک اوار ءُ۔
