اسلام آباد۔ 09 دسمبر (اے پی پی) صدر مملکت ڈاکٹر عارف علوی وڈی خوری نا توننگ کن اجتماعی کوشست آتا گرج آ زور شاغسا پارینے کہ سخت کانود ، اوڑآ عملدرآمد، دمدستی انصاف، راج انا وڈی خوری نا برخلاف بے سگی، خداخوفی و میڈیا نا کمک اٹ آگاہی اٹ دالعنت نا مون ءِ توننگ مریک، ملک آن وڈی خوری نا چٹفنگ کن پبی کوشست برجاءِ، دنیا اخلاقیات آ مبنی سرکڑدہ کن توار خلنگ ءِ و دا سرکڑدہ پاکستان آن پیش تمک۔ داخیال آتا درشانی ءِ او پنچ شنبے نادے آ انسداد وڈی خوری نا جہانی دے انا وخت آ ’’کرپشن آن پاک پاکستان قوم انا گمر‘‘ نا سرحال آ سیمینار آن تران کرسا کرے۔ اوپارے کہ وڈی خوری نا برخلاف نیب آفیسر آتا کارکڑد و کوشست آتا ستاءِ کینہ، لالچ خراب ءُ گڑاسے و ہندا ہیت ءِ مون آتخسا نیب آفیسر آتا کڑد انا پکائی اتون وڈی خوری نا چٹفنگ کن کوشست کیرہ۔ اوپارے کہ 6 سوب آن وڈی خوری ٹی کمتی اتنگ مریک، وڈی خوری نا توننگ کن کانود اس بایدے مرے، کانود جوڑ کننگ پارلیمنٹ نا زمواری ءِ وخت اس کہ ارٹ میکو بھلا عنصر کانود آ عملدرآمد ءِ ہراکہ ایگزیکٹیو نا کاریم ءِ، کانود آ سختی اٹ عملدرآمد مریک تو اوڑآن وڈی خور زموار آتیٹی خلیس ودی مریک۔ اوپارے کہ نظام انصاف اٹ گچینی و عدالت آتیٹی ترندی اٹ انصاف نا فراوانی آن ہم وڈی خوری ٹی کمتی اتنگ مریک ساڑی آ اسہ سروے سے نا پرسپیشن انڈیکس اٹ داہیت پیدوار مسنے کہ کیس آتا طوالت نا سوب آن انصاف نا فراوانی زہمی مریک، پولیس اٹ غٹ آن زیات کرپشن نا تاثر ءِ، ساڑی آ سروے رپورٹ اٹ مخلوق سخت کانود و سخت سزا تننگ نا سلاہ تسنے، ہراتم مخلوق ءِ سزا ملنگ اٹ ہرے مریک تو اوفتے ٹی نااومیتی، مایوسی و ہیجانی نا کیفیت ودی مریک۔ اوپارے کہ اگہ انسان اٹ اللہ نا خوف مریک تو او ڈوہ و بے ایمانی آن پاناد کیک، اسلامی تاریخ اٹ ہم امانت داری نا تلقین کننگانے و دااسلام نا بنداوی کلہو ہم ارے، ہنداوڑ راج ہم وڈی خوری نا توننگ کن تینا کڑد ءِ ادا کے۔ راج انا تنقید و زور آن ہم وڈی خوری ٹی کمتی اتنگ مریک، سیالکوٹ کون آ واقعہ غاتا رداٹ راج انا کڑد و سوچ اہم مریک، راج وڈی خوری نا برخلاف بے سگی نا رویہ اختیار کے۔ صدر مملکت پارے کہ وائٹ کالر کرائمز نا جاست و پاست کننگ بھلو چیلنج اسے، وڈی خوری نا چٹفنگ کن اجتماعی کوشست آتا گرج ءِ، اسلام اٹی رشوت ہلوک و تروک ہڑتوم آتے جہنمی گودنگانے۔ اوپارے کہ وڈی خوری نا توننگ اٹ میڈیا نا اہم ءُ کڑد اسے، دارداٹ وسل بلور ایکٹ اہمیت تخک، اینو پگہ میڈیا پس منظر ءِ ہُننگ آن بیدس صحافت کننگ ءِ، میڈیا الس ءِ آگاہی فراوان کے۔ اوپارے کہ نیب وڈی خور زموار آتیان 821 ارب روپئی ہلسا قومی خزانہ ٹی جمع کرفینے ہراکہ نمان کارکڑد اسے ولے وڈی خوری ءِ توننگ کن پین کوشست آتا گرج ءِ۔ اوپارے کہ مستین اٹ وڈی خوری ٹی پدریسہ ودکی مس، چندی وڑتے اٹ منی لانڈرنگ کننگا، گڑاس ملک آک دُزی و منی لانڈرنگ نا پیسہ غاتے اٹ کاروبار کننگ نا آسراتی تسر، اوغانستان، شام و لیبیا تون اوار ایلو ملک کون آ حالیت آتا سوب وڈی خوری ٹی ودکی مس۔ داوخت آ صدر مملکت گچین کارکڑد نشان تروک آ نیب آفیسر آتیٹی سفتی سرٹیفکیٹس بشخا۔
