اسلام آباد۔ 11اپریل (اے پی پی) سی پیک ڈٹ دنیا ٹی جاری غٹ آن بھلا شونداری ڈٹ ئِ، 57 ارب ڈالر مالیت آن زیات نا پاک چین اقتصادی راہداری ڈٹ پاکستان ئِ ترند رفتار اقتصادی شونداری نا شاہراہ غا دیک، مریس، کشادہ و رکھوک روڈ آتا ڈٹ آتا پوروی آن پاکستانی الس کن روشنا آخبت نا نوید ئِ۔ پلاننگ کمیشن نا دستاویز آتا رداٹ بنجائی حکومت مالی سال 2016-17 نا سرکاری بشخ انا شونداری پروگرام تیٹی وزارت مواصلات نا 84 ڈٹ آتے کن اسہ کھرب 93 ارب 28 کروڑ 52لکھ 65ہزار روپئی آن 1کھرب 66 ارب 20 کروڑ روپئی آن زیات نا فنڈ جاری کرینے۔ گدرینگوک آ سال انا ایسر اٹی بیجنگ اٹی اسیجائی کمکار کمیٹی (جے سی سی) ٹرانسپورٹ انفراسٹرکچر نا اِرا بھلا ڈٹ ملتان سکھر موٹروے و قراقرم ہائی وے نا حویلیاں تھاکوٹ سیکشن ئِ سی پیک کن اہم ئُ مزل نا نشان اس گوندسا داڑ آ کاریم نا رفتار و دارداٹ پاکستانی حکومت نا کنڈآن کروک آ سیکورٹی و ایلو بست و بندی گام گیج آتیا است جمی نا درشانی ئِ کرے۔ جے سی سی روڈ انفراسٹرکچر نا مسہ پین ڈٹ آتا ہم منظوری ئِ ترسا اوفتا دمدستی فنانسنگ کن تعلقدار ادارہ غاتے غٹ کارروائی پورو کننگ نا پارت جاری کریسس۔ ڈٹ آتیٹی سی پیک روٹ آ قراقرم ہائی وے تھاکوٹ آن رائے کوٹ 136کلومیٹر شاہراہ نا بحالی، بلوچستان نا الس کن اہم ڈٹ خضدار۔بسمیہ شاہراہ و دیکی روٹ آ ڈیرہ اسماعیل خان ژوب روڈ انا اپ گریڈیشن نا ڈٹ آک اوار ئُ۔ جے سی سی نا فیصلہ نا رداٹ دیکی روٹ آ گوادر سوراب650 کلومیٹر شاہراہ ئِ فعال جوڑ کننگ و ہکلہ ڈیرہ اسماعیل خان موٹروے آ جاری کاریم نا رفتار ترندی اٹ برجائِ۔
