پاکستان پرامن ئُ ملک اسے ، ڈیہہ و ہمسایہ ملک آتون گچین تعلقداری خوائک، بدلینگوک آ دنیا ٹی قومی سلامتی نا گرج آک بدل مننگ ئُ، ملک انا سوگو دفاع ہرخلیس تون مون تننگ نا پورو لائخی تخک
وزیراعظم محمد نواز شریف نا پی اے ایف اصغر خان اکیڈمی رسالپور اٹی کیڈٹس نا پاسنگ آﺅٹ دود آن تران
رسالپور/اسلام آباد۔11اپریل (اے پی پی) وزیراعظم محمد نواز شریف پارینے کہ بانی پاکستان قائد اعظم محمد علی جناح َ نا وژن نا رداٹ اسیجائی شونہالی ننا مشن ئِ، پاکستان ڈیہہ و ہمسایہ ملک آتون گچین تعلقداری خوائک، ملک انا شونداری و شونہالی بانی پاکستان قائد اعظم محمد علی جناح ؒ نا مشن ئِ، پاکستان اسہ پرامن ئُ ملک اسے و پاکستان نا سوگو دفاع ننا عزم ئِ۔ سے شنبے نا دے پی اے ایف اصغر خان اکیڈمی رسالپور اٹی کیڈٹس نا گریجوایشن پاسنگ آﺅٹ نا دود انا وخت آ تران کرسا وزیراعظم محمد نواز شریف پارے کہ پی اے ایف اکیڈمی آن تربیت ہلوک آ کیڈٹ آک مبارکباد نا حقدار و اینو نا دے اوفتے کن خصوصی اہمیت نا حامل ئِ۔ اوپارے کہ گرایجویشن پورو کروک آ کیڈٹ آک اینو نا دود ئِ وخت اس ہم گیرام کننگ کپسہ و دا وخت اوفتا زند اٹی ولدا بفک۔ اوپارے کہ نن بایدے سخت خواری کین و ننا سرسہبی تیٹی سخت خواری نا بھرم اوار ئِ۔ اوپارے کہ نما کوپہ غاتیا وطن نا دفاع نا بھلو زمواری اس مریک و ملک انا سلامتی و رکھ اکن ننا ہیرو تا قربانیک ستاکڑزرہ۔ اوپارے کہ نمے قوم انا پت آ پورو سلوئی مریک وخت اس کہ ساڑی آ دور انا پوسکن آ ٹیکنالوجی نا سوب نمے آ پین ودکی زمواری عائد مریک۔ نم بایدے تینا سرسہبی نا سفر ئِ برجاتخبو تانکہ تینا کیریئر اٹی پین سرسہبی دوئی کننگ کیرے۔ اوپارے کہ ملکی فضائی دنگ انا رکھ نما زمواری ئِ ۔ وزیراعظم محمد نواز شریف پارے کہ پاکستان امن تون مابت کروک آ ملک ئِ و ڈیہہ نا ایلو ملک آتون اوار اوار تینا ہمسایہ ملک آتون ہم پرامن تعلقداری تا خواہش مند ئِ و نن تینا ہمسایہ غاتون سنگتی نا بنداو آ تعلقداری خوانہ و پاکستان سنگتی نا دوئِ مون آ کننگ اٹی ہچکچاہٹ نا مظاہرہ ئِ کتنے۔ اوپارے کہ بابائے قوم قائداعظم محمد علی جناح ؒ نا پرامن ہمسائیگی نا نظریہ نا رداٹ نن تینا آجوئی نا رکھ ئِ کننگ اُن۔ اوپارے کہ پوسکن آ دور اٹی جنگ آک بیرہ فوج اٹ کننگ مفسہ بلکن اوفتے ٹی قوم تا کڑد ہم بے کچ اہم ئِ و معاشی شونداری نا کمک اٹ جہانی برادری ٹی اہم ہنداس دوئی کننگ مریک۔ اوپاکستان ایئر فورس نا شاہنی تے مخاطب کرسا پارے کہ او ملک انا دفاع و سلامتی ئِ پین سوگو جوڑ کننگ کن کاریم کیر و مچ آ قوم اوفتے تون سلوک ئِ۔ اوپارے کہ پاکستان دہشت گردی نا چٹفنگ و قومی سلامتی کن پرعزم ئِ۔ وزیراعظم پارے کہ پاکستان ایئر فورس آپریشن ضرب عضب اٹی کلیدی کڑد ادا کرے و پاکستان ایئر فورس و اونا سروک آتا کوشست آک قدر انا قابل ئُ۔ اوپارے کہ نمے آملک انا دفاع نا زمواری عائد مریک و یخین ئِ کہ نم پورو عزم و لگن اتون ملک انا خذمت ئِ کیرے و تینا قوم انا پت آ پورو سلرہ۔ اوپارے کہ سرسہبی کن ہچ ئُ گونڈئُ کسر اس مفک بلکن اوڑکن پدریسہ خواری و لگن نا گرج مریک۔ اوپارے کہ پاکستان اسہ پرامن ئُ ملک اسے و پاکستان نا سوگو دفاع ننا عزم ئِ۔ وزیراعظم محمد نواز شریف پارے کہ پی اے ایف اصغرخان اکیڈمی ٹی بڑزکو معیار نا تربیت فراوان کننگ انگ ئِ و اینو نا دود کیڈٹ آتا مخلصانہ خواری نا بھرم نا نتیجہ ئِ۔ اودا یخین نا درشانی ئِ کرے کہ پاس آﺅٹ مروک آ کیڈٹ آک پورو عزم اتون ملک انا خذمت ئِ کیرہ۔ وزیراعظم پارے کہ بدلینگوک آ دنیا ٹی قومی سلامتی نا گرج آک بدل مننگ ئُ و ملک انا سوگو دفاع ہر خلیس تون مون تننگ نا پورو لائخی تخک۔ وزیراعظم محمد نواز شریف پاسنگ آﺅٹ پریڈ نا معائنہ ئِ کرے وپاس آﺅٹ مروک آ کیڈٹ آتے بیج خلک۔ 93 ایوی ایشن کورس اٹی گچین کارکڑد نشان تروک آ شایان احمد ٹرافی اس ہلک۔ ایوی ایشن نا 113 کیڈٹ گرایجویشن ئِ پورو کریر ۔ گچین کارکڑد آ انڈر آفیسر نوشیروان علی اعزازی شمشیر دوئی کرے۔پاسنگ آﺅٹ نا دود اٹی 137 می جی ڈی پی، 83 می انجینئرنگ، 93 ایئر ڈیفنس ، 18 اے اینڈ ایس ڈی، شش می نیوی گیشن و ایلو لاجسٹک کورس آتا کیڈٹ آک شرکت کریر۔ وزیراعظم نمبر اسٹ چیمپین سکوارڈن ئِ قائد اعظم بینر ہم تس ۔ 93 ایوی ایشن کورس اٹی گچین کارکڑد آ عمران خان ئِ ٹرافی تننگا وخت اس کہ انجینئرنگ نا بشخ اٹی گچین کارکڑد نشان تننگ آ مہرین اعظم ٹرافی و ونگ انڈر آفیسر مبشر آفتاب ئِ ہم ٹرافی تننگا۔ پاسنگ آﺅٹ پریڈ اٹی وزیر دفاع خواجہ محمد آصف ، پاک فضائیہ نا سروک ایئر چیف مارشل سہیل امان ، گورنر خیبر پختونخوا ظفر اقبال جھگڑا، سفارتکار و بڑزکو عسکری کمامدارآک ہم ساڑی ئسر۔
