اسلام آباد۔ 01 دسمبر (اے پی پی) وزیراعظم نا سلاہکار خزانہ نا ترجمان مزمل اسلم پارینے کہ مالی سال انا اولیکو پنچ تُو اٹی انکم خراج ہلنگ نا کچ اٹی 31 درسد ودکی ریکارڈ کننگانے، مالی سال انا ارٹ میکو نیمہ ٹی برآمد آتے ٹی ودکی نا رفتار برقرار سلک۔ چارشنبے نادے آ تینا ٹویٹ آتے ٹی ترجمان پارے کہ ایف بی آر اولیکو پنچ تُو اٹی انکم خراج نا مد اٹی 761 ارب روپئی جمع کرے ہرا تدوک آ مالی سال انا ہند امد انا مقابلہ ٹی 31 درسد(144ارب روپئی ) زیات ءُ۔ اوپارے کہ درآمدی ریسہ غا 114 ارب روپئی نا انکم خراج جمع مس۔ دلچسپ ہیت دادے کہ پٹرولیم آ سیلز خراج صفر مننگ نا سوب آن ہندی وڑاٹ سیلز خراج کم مسنے۔ مزمل اسلم پارے کہ برآمدی بشخ اٹ ترندی بننگ ءِ۔ برآمد آتے ٹی ودکی نا رفتار مالی سال انا ارٹ میکو نصف اٹ ہم برجاسلک۔ داڑتون اوار اوار درآمد آتے ٹی کمتی بریک ۔ فی الوقت درآمد آتا سوب آن نہاد آتیا اثرتمنگ ءِ۔ ترجمان پارے کہ جہانی کہول آ کبینی نا کچ اٹ ودکی مسنے ہرانا بنداوی سوب کنوئی آ گڑاتا نہاد آتے ٹی ودکی و رسد نا چین اٹ اڑاند ءِ۔ یورو زون نا ڈیہہ ٹی نومبر اٹی کبینی نا کچ اٹی 4.9 درسد نا ودکی مسنے۔
