اسلام آباد۔ 01 دسمبر (اے پی پی) نیشنل کمانڈ اینڈ آپریشن سینٹر اٹی تدوک آ دے کورونا دین انا حالیت آتیا دیوان اس اڈتننگا ہراٹی دینی مرض انا چارٹ انا حساب وکتاب، قومی ویکسین نا حکمت عملی و مچ آ ملک اٹی ناجوڑی نا تالانی آ گپ وتران مس۔ این سی او سی دیوان نا کماشی ءِ بنجائی وزیر ڈٹ بندی، شونداری و خصوصی گام گیج اسد عمر و نیشنل کوآرڈنیٹر میجر جنرل محمد ظفراقبال و وزیراعظم نا خصوصی کمکار جان جوڑی ڈاکٹر فیصل سلطان ئسک کریر۔ وخت اس کہ صوبائی وزیر جان جوڑی و چیف سیکرٹریک ویڈیو لنک انا کمک اٹ دیوان اٹی بشخ ہلکر۔ فورم ءِ کورونا انفیکشن نا مثبت بیٹ کچ، ناجوڑی نا تالانی، مرک آتا کچ و پوسکن آ کیس آتا بارواٹ پاننگا۔ فورم شار تا رداٹ کوویڈ۔ 19 ویکسی نیشن نا جم عمل آ سرجمی اٹ گپ وتران کرے۔ فورم ویکسی نیشن نا المی نظام نا بابت سخت گام گیج کننگ آ امنا کرے۔ دیوان اٹی داہیت آ ہم گپ وتران کننگا کہ ویکسی نیشن ٹیم تے چندی السی ہند آتیا تعینات کننگے تانکہ وخت آ ساڑی بندغ آتے ویکسین خلنگ مرے۔ دارداٹ دسمبر آن پد آن خصوصی مہم اس چلیفنگک۔ فورم صوبہ و تعلقدار کمامدارآتے ویکسی نیشن نا المی نظام نا بابت سختی اٹ عملدرآمد نا پالیسی آ عمل نا پارت کرے۔ ہموخلقت اسکان رسینگ کن کال سینٹرز جوڑ کننگانے ہرافک داسکان ویکسین نا ارٹ میکو خور ءِ خلفتنو۔ مچ آ ملک اٹی کل 40 کال سینٹرز جوڑ کننگانے وخت اس کہ کورونا ویکسین نا ارٹ میکو خور ءِ پک کننگ کن داکال سینٹرآتا کچ اٹ ہم ودکی کننگک۔ اوکان پد فورم ءِ مستی پارسا صوبائی وزرائے جان جوڑی و چیف سیکرٹریک ویکسی نیشن مہم ءِ ودفنگ، ٹیسٹنگ نا حساب وکتاب ءِ گچین کننگ و کال سینٹر آتا جوڑ کننگ کن کروک آ گام گیج آتا بارواٹ معلومدارکریر۔ غٹ صوبہ غاک ویکسی نیشن نا ہدف آتے دوئی کننگ کن دمدستی وڑاٹ ویکسی نیشن آؤٹ ریچ مہم اسے نا بناءِ کیرہ۔ صوبائی نمائندہ غاک کورونا دین انا پوسکن آ وڑآ چکار تننگ نا گرج آ ہم زور شاغار و ویکسی نیشن نا حالیت و پردیسی تا جاچ اکن بالی پٹ آتیا المی گام گیج کننگ نا سلاہ تسر۔ فورم ءِ 18 سال آن زیات وئی نا مخلوق ءِ ویکسین بوسٹر نا حکمت عملی نا بارواٹ ہم سرجمی اٹ پاننگاہراٹی مسہ کیٹگری ہرافتے ٹی ہیلتھ کیئرورکرز، 50 سال آن بڑز و امیونو کمپر ومائزڈ اوار ءُ۔ دا خور مفت مریک و اودے ویکسین نا آخیریکو خور انا 6 تُو آن پد تننگ مریک۔ داہیت آ ہم زور شاغنگاکہ کورونا نا پوسکن آ وڑ’’اومیکرون‘‘ مچ آ دنیا ٹی ترندی اٹ تالان مننگ ءِ و دانا برخلاف بیرہ کورونا غان بچفنگ نا رکھی ویکسین ءِ۔ ویکسین آن بیدس بنداوی ایس او پیز بشمول ماسک بیننگ، راجی مُری و دوتا سلنگ ءِ پک کننگے۔
