اسلام آباد۔ 29 نومبر (اے پی پی) وزیراعظم عمران خان پاکستان نا جامعہ غاتے ٹی پٹ وپول نا گرج ءِ تالان کرسا پارینے کہ تینا بروک آ چین تے سیرت النبی صلی اللہ علیہ و آلہ وسلم نا رغاموک آتیان معلومدار کننگ و کڑد سازی کن القادر یونیورسٹی و رحمت اللعالمین اتھارٹی پٹ وپول نا اہم ءُ ہند مریرہ، القادر یونیورسٹی مسلم امہ ءِ مون تروک فکری ویل آتے ایسر کننگ نا بابت جہانی اسکالرآتا کمک اٹ پٹ وپول و شرہ نا وت مریک، قرآنی پرمان تیان پد ہم راج اٹ اجتہاد آن مری بدبختی اسے، عظیم ءُ قوم اس جوڑ مننگ کن عظیم ءُ کڑد اس درکار مریک، خودغرض ، اخلاقی قدر انا حامل راج ءِ ایٹم بمب ہم بھس کننگ کپک، لغور و وڈی خور بندغ وخت اس ہم لیڈر جوڑ مننگ کپک۔ دوشنبے نادے آ جہلم اٹی القادر یونیورسٹی نا اکیڈمک بلاکس نا بناءِ کننگ نا وخت آ تران کرسا وزیراعظم پارے کہ ای تاریخ نا طالب علم اسے اُٹ، ای تاریخ نا خوڑتی اٹ مطالعہ ءِ کریٹ، پاکستان تینا جوڑ مننگ آن پد ترندی اٹ شون ہلککہ۔ 1960 انا دہائی ٹی دنیا ٹی پاکستان نا اسہ حیثیت اس ئس و پاکستانی تا دنیا ٹی بھلو شرف اس ئس۔ ہمووخت آ داپیش گوئی کننگاکہ پاکستان ایشیانا کیلفورنیا جوڑ مننگ والا ءِ، ولدا ننن داڑے زوال ءِ برسا خنان۔ اوپارے کہ ای تینا عقیدہ نا بنا آ سیاست اٹ بسٹ انتئے کہ سیاست اٹ بننگ آن مست ای دولت، شہرت تون اوار غٹ ءِ خناٹ و دوئی کریسٹ۔ اوپارے کہ اسہ انسان اسے آ اللہ نا غٹ آن بھلا نعمت ایمان ءِ، ایمان ولا بندغ دولت ، شہرت، انا، ذات ، برادری نا زمزیر آتا خوف آن آجومریک ہراتم انسان دازمزیرآتیان آجو مرے تو اونا لائخی ءِ کاریم اٹ اتنگ آن کس اس توننگ کپک۔ انسان ءِ اللہ اشرف المخلوقات کرے، اودے ہمولائخی تے تس ہراپین مخلوق اسے ٹی اف۔ اوپارے کہ ای مدینہ نا ریاست نا مطالعہ ءِ کریٹ، آخر انت سوب اس ئس کہ 2 سپرپاورز آتا ساڑی گری ٹی بظاہرکم خوانوک آ مخلوق دنیا نا امامت نا بناءِ کرے۔ اوپارے کہ پاکستان اسلام نا پن آ جوڑ مس۔ ای تینا مطالعہ غان دا نتیجہ غا سرمسٹ کہ ہراتم اسکان نن سیرت النبی صلی اللہ علیہ و آلہ وسلم آ چلینگپنہ، علامہ اقبال نا تغ ءِ پورو کننگ کپنہ۔ اونا سوچ کس اسے نا ذہنی غلامی و نوآبادیاتی نظام آن آجوئی ئس انتئے کہ ذہنی غلامی جسمانی غلامی آن زیات خوفناک مریک۔ دیکی تہذیب و اسلام نا موازنہ غا علامہ اقبال شکوہ جواب ءِ شکوہ نوشتہ کرے۔ وزیراعظم پارے کہ ننا تعلیمی نظام شونداری نا کسر اٹ بھلواڑاند اسے۔ اسہہ کنڈآ انگریزی نصاب تعلیم ایلو کنڈآ اردو و ولدا دینی مدرسہ دا ہرمسٹ آ متوازی نظام تعلیم آن مسہ جتا تپہ غاتا پیش تمنگ بناکرے ہرافتا اسہ ایلو تون ہچ ءُ واسطہ اس اف۔ ہنداخاطرآن نن مچ آ ملک اٹی اسہ وڑ نصاب تعلیم اس رائج کننگ نا فیصلہ کرین۔ وزیراعظم پارے کہ غٹ آن زیات پاکستانی مخلوق اللہ نا پن آ خیرات کیک، نماز، روچہ، حج وعمرہ نا پابند ءُ۔ اسلام نا برخلاف ہراتم معاملہ اس مرے تو غٹ آن مست پاکستانیک پیش تمرہ۔ نن اسہ کنڈآ سُچا عاشق رسول صلی اللہ علیہ و آلہ وسلم و ننا دین آ غٹ آن زیات زور ءِ ولے بدبختی ءِ کہ ننا زند اونا عملی وڑ اف۔ اسہ واقعہ سے نا ذکر ءِ کرسا اوپارے کہ پاکستان نا اسہ بھلو اسکالر اس اشفاق احمد نا چین نا عظیم راہشون ماؤزوئے تنگ تون اوڑدہی مس تو چینی راہشون پاکستان ءِ عظیم ءُ قوم اس گوندا۔ اونا پاننگ ئس کہ ہرا قوم ترند انگا باسنی ٹی اللہ نا خوف انا سوب آن روچہ نا حالیت اٹ دِیر کُنپک او اللہ نا خوف آن رشوت آن ہم بچنگ کیک، او پورو ٹیکس ہم تننگ کیک، داوڑنا ملک ءِ کس اس شونداری آن توننگ کپک۔ وزیراعظم پارے کہ ہندا مدینہ نا ریاست نا اصول ئس۔ ہموڑے خوداحتسابی ئس۔ مسلمان تا کڑد انا سوب آن غیر مسلم اسلام ءِ قبول کریرہ۔ اوپارے کہ ننے عظیم قوم اس جوڑ مننگ کن عظیم ءُ کڑد اس تینا کین۔ نبی صلی اللہ علیہ و آلہ وسلم نا نبوت آن مست درستی راستی صادق و امین نا ئس۔ اوپارے کہ سچا و انصاف نا بنداو آ کڑد جوڑ مریک۔ داصفت آتیان بیدس کس اس لیڈر جوڑ مننگ کپک۔ وزیراعظم پارے کہ نبی صلی اللہ علیہ و آلہ وسلم نا سیرت نا مطالعہ کن ادارہ اس جوڑ کننگ نا سوچ پیش نظر ئس۔ نن عاشقان رسول صلی اللہ علیہ و آلہ وسلم و اونا سیرت آ عمل کروک ءُ قوم اس جوڑ مننگ کینہ۔ پاکستان نا جوڑ کننگ اٹ ہرا اولیاکرام تا کڑد ئس او سُچا عاشق رسول صلی اللہ علیہ و آلہ وسلم ئسر۔ اولس انسان تا زبان اٹ سیرت نبوی صلی اللہ علیہ و آلہ وسلم نا کلہو ءِ مخلوق اسکان سرکریر۔ وزیراعظم پارے کہ نن دا مسخت کن رحمت اللعالمین صلی اللہ علیہ و آلہ وسلم اتھارٹی اس جوڑ کرینن۔ داڑکن میڈیا ءِ کاریم اٹ اتینہ۔ مخلوق ءِ سیر ت النبی صلی اللہ علیہ و آلہ وسلم آن آسان زبان اٹ آگاہی ایتنہ۔ وزیراعظم پارے کہ مدینہ نا ریاست اٹ اخس کم وخت اٹ اسٹ آن زیات اسہ عظیم ءُ انسان اس مون آ بس دنیا نا تاریخ اٹ دانا درور ملیپک۔ داڑآ ہم دا یونیورسٹی ٹی پٹ وپول کینہ انتئے کہ یونیورسٹی نا بنداوی کاریم پٹ وپول مریک۔ اسلام نا تاریخ اٹ مچ آ سائنسدان و دانشور آک اوار ہنارہ۔ اسلام و سائنس اٹ ہچ ءُ تصادم اس اف۔ وزیراعظم پارے کہ پاکستان اٹ یونیورسٹی تیٹی پٹ وپول نا گرج ءِ۔ تینا بروک آ چین تے دیکی تہذیب آن معلومدار کننگ کن پٹ وپول المی ءِ تانکہ اوفتے پاننگے کہ دیکی ٹی اگہ ٹیکنالوجی شونداری نظر بننگ ءِ تو ایلو کنڈآ اوفتا عبادت گاک خورک مننگ ءُ۔ بیرہ مادی شونداری آن راج اٹ بے بریبری ودی مننگ ءِ۔ دابابت ننا ورناچین ابہام نا گواچی ءِ۔ داشونداری ءِ خنسا اودا تکرہ کہ نن پدی سلیسونن۔ دیکی ٹی مروک آ دا شونداری نا اثرآتا بابت پٹ وپول کننگ یونیورسٹی تا کاریم ءِ۔ اوپارے کہ دنیا ٹی داوخت آ غٹ آن بھلا چیلنج موبائل فون ءِ۔ اونا مثبت اثرآتون اوار اوار منفی اثرآک ءُ و اوفتے آن امر بچوئی ءِ؟ نن سوشل میڈیا ءِ بند تو کننگ کپنہ ولے تیناچناتے جوان و خراب نا رغامنگ کینہ و اوفتے ٹی شعور ودی کننگ کینہ۔ القادر یونیورسٹی جہانی اسکالرآتا کمک اٹ پٹ وپول، شرہ نا ہند اس جوڑ مریک۔ ننا بدبختی ءِ کہ نن تینا راج اٹ اجتہاد مننگ کن الیپنہ حالانکہ اجتہاد قرآن نا پرمان ءِ۔ ننابدبختی ءِ کہ موقف آن اختلاف رائے تخوک آتے کافر گوندنہ ہراتم داوڑنا سوچ مرے تو نن مون آ امر ہِننگ کینہ۔ کفر انا فتویٰ تا خوف مفننگ نا سوب آن ننا مقابلہ ٹی دیکی ٹی اسلام آ زیات پٹ وپولی کاریم مننگ ءِ۔ اوپارے کہ پاکستان لائخی تیان شُپ ءُ ملک اسے ۔ داڑے ہرگڑاارے بیرہ باکڑدار سرکڑدہ غاتا کمتی مسنے۔ الس نا خذمت پیغمبرانہ کاریم اسے۔ اوانسانیت نا خذمت کن بس۔ ایلو کنڈآ ہراتم کس اس لیڈر اس جوڑ مرسا قوم انا پیسہ غاتے دُزی کے تو ملک اکن اوکان زیات بھلو عذاب اس پین ہچ ءُ مننگ کپک۔ نبی صلی اللہ علیہ و آلہ وسلم لیڈر شپ نا ہراتصور ءِ تسوسس اوڑآ دا یونیورسٹی و رحمت اللعالمین صلی اللہ علیہ و آلہ وسلم اتھارٹی پٹ وپول کیرہ۔ وزیراعظم راج اٹ وڈی خوری نا بھسکاری تے مون آ تخسا پارے کہ وڈی خوری آن راج بھس مریک و اگہ نن پاکستان ءِ ہُرن تو 1985آن پد دا ملک اٹ غٹ آن بھلا بھسکاری وڈی خوری نا دروشم اٹ بس۔ ہندن ءُ راج اس ہراٹی خواری کروک آ دا ہُرے کہ کوزہ گروپ بھلو بھلو پلازہ ہم جوڑ کیک و او اسمبلی تسکان ہم سرمریک تو داوڑنا راج اٹ اخلاقیات شون ہلنگ کپک۔ ننا بدبختی ءِ کہ سپریم کورٹ آن سزاکنوک آ بندغ دروغ تڑسا ملک آن نروک ءِ۔ اواخلاقی قدر انا اہمیت آ زور شاغسا پارے کہ اخلاقی قدر انا حامل راج ءِ ایٹم بمب ہم بھس کننگ کپک۔ ننے بروک آ چین تا سیرت النبی صلی اللہ علیہ و آلہ وسلم نا رداٹ کڑد سازی ءِ کروئی ءِ۔
