اسلام آباد۔ 10 اپریل (اے پی پی) امریکہ ٹی پاکستان نا سفیر اعزاز چوہدری پارینے کہ ملک اٹی زرکاری نا مون آدننگ و پیشن نا زرکارآتے آسراتی و آسانی فراوان کننگ کن ساڑی ہی ٹی سیکورٹیز اینڈ ایکسچینج کمیشن ہرا گام گیج آتے کرے، اوفتا جہانی کہول آ ستائِ کننگ انگ ئِ۔ او واشنگٹن اٹی ایس ای سی پی نا اسہ ڈل اسے تون ہیت وگپ کریکہ۔ ایس ای سی پی نا افسر آک امریکہ نا سیکورٹیز اینڈ ایکسچینج کمیشن اٹی سیکورٹیز مارکیٹ نا شونداری و مون آدننگ آ بیست ئُ ہفت می سالانہ کانفرنس اٹی شرکت کریر۔ ایس ای سی امریکہ پاکستان اٹی سیکورٹیز مارکیٹ اٹی کروک آ اصلاحات نا پس منظر اٹی ایس ای سی پی ئِ خصوصی وڑاٹ داسالانہ کانفرنس اٹی شرکت نا سلہ خلکوسس۔ اعزاز چوہدری ملک اٹی زرکارآتے مون آ دننگ نا غرض آن کارپوریٹ سیکٹر و کیپٹل مارکیٹ اٹی درستی راستی کرفوک آ اصلاحات آتا ستائِ کرےو اسہ منظم کارپوریٹ سیکٹر و مالیاتی مارکیٹ نا اڈتننگ کن جامع ریگولیٹری کڑد ادا کننگ آ ایس ای سی پی نا سروکی نا ستائِ کرے۔ داوخت آ امریکہ نا کامرس ڈیپارٹمنٹ نا بڑزکو افسر آک ہم ساڑی ئسر۔ کیپٹل مارکیٹ اٹی زرکاری نا مون آ دننگ و کاروبار کن جوان و سازگار چاگڑد اس فراوان کننگ کن کانود اٹی ترمیم نا کمک اٹ اہم اصلاحات درستی راستی کرفے ہرافتے ٹی سیکورٹیز ایکٹ 2015 نا اجرا، ایس ای سی پی ایکٹ 1997 ٹی ترمیم، غیر مالیاتی بینکاری ادارہ غاتا ضابطہ غاتا تشکیل نو، سیکورٹیز بروکرز نا ضابطہ ٹی ترمیم، ریسرچ انالسٹ ریگولیشن و پرائیویٹ ایکویٹی فنڈ ریگولیشن نا جاری کننگ قابل ذکر ئِ۔ داکان مست امریکہ نا سیکورٹیز اینڈ ایکسچینج کمیشن نا سروک مائیکل پائیوار ہم ایس ای سی نا سالانہ کانفرنس آن تران اٹی ایس ای سی پی نا کوشست و گام گیج آتا ستائِ کریسس۔ ایلو ملک آتا ڈل آک ہم پاکستان نا کیپٹل مارکیٹ اٹی کروک آ اصلاحات آتا ستائِ کریر۔
