کم آن کم ممکنہ وخت اٹی بجلی نا لوڈشیڈنگ نا پوروی اٹ چٹفنگ حکومت نا اولیتئِ، حکومت دا مسخت نا دوئی کن گدرینگوک آ مسہ سال اٹی ترندی اٹ کاریم کرینے و درکار ہدف ئِ دوئی کننگ کن غٹ بنداوی کاریم تے پورو کننگانے
اسلام آباد۔ 10 اپریل (اے پی پی) وزیراعظم محمد نواز شریف پارینے کہ کم آن کم ممکنہ وخت اٹی بجلی نا لوڈشیڈنگ نا پوروی اٹ چٹفنگ حکومت نا اولیت ئِ ، حکومت دا مسخت نا دوئی کن گدرینگوک آ مسہ سال اٹی ترندی اٹ کاریم کرینے و درکار ہدف ئِ دوئی کننگ کن غٹ بنداوی کاریم تے پورو کننگانے، نن لوڈشیڈنگ فری پاکستان کن درست سمت اٹی روان اُن۔ اوداہیت ئِ دوشنبے نا دے داڑے توانائی نا بارواٹی کابینہ کمیٹی نا دیوان نا کماشی ئِ کرسا پارے۔ سیکرٹری دیر و بجلی دیوان ئِ ہندا موسم اٹی درجہ حرارت اٹی زوت ودکی و کوڑی تیٹی دیر انا کہول کم مننگ نا سوب آن بجلی نا طلب اٹی ودکی نا بارواٹی معلومدار کرے۔ دیوان ئِ بجلی نا طلب و رسد نا بارواٹی پاننگا۔ دیوان ئِ معلومدار کننگا کہ 2017 ءنا ایسر اسکان 5710 میگاواٹ بجلی نظام اٹی اوار مریک۔ دیوان اٹی گردشی وام ، وصولی و لین نسخان آتا ویل آتیاہم شرہ مس۔ سیکرٹری پٹرولیم و قدرتی وسیلہ دیوان ئِ بجلی نا بشخ ئِ ایندھن و گیس انا دوئی و اُرائی، صنعتی و واپاری صارف آتے پوسکن آ گیس کنکشن تا فراوانی نا بارواٹی معلومدار کرے۔ وزیراعظم پارے کہ 8 ہزار میگاواٹ آن زیات نا پوسکن آ پیداوار جون 2018 ءآن مست نیشنل گریڈ اٹی اوار مننگ تون نن لوڈشیڈنگ فری پاکستان کن سہی سمت اٹی روان ئِ۔ اوپارے کہ حکومت نئے بیرہ ملک اٹی توانائی نا ساڑی کاختی ئِ مر کننگ آ چکار تخانے و بلکن توانائی نا بروک آ ودوک آ گرج آتے پورو کننگ کن ہم پرعزم ئِ۔ وزیراعظم کاریم نا معیار و کچ آ سمجھوتہ کننگ آن بیدس بجلی نا ڈٹ آتا زوت پوروی نا پارت کرے۔ اوصارف آتا آسراتی کن چندی سرکاری ادارہ غاتا نیام اٹ رابطہ غاتے ودفنگ نا ہم پارت کرے۔ اوپارے کہ جاری ڈٹ آتا پوروی کن تخوک آ وخت انا بابت ہچ ئُ سستی اسے سگنگ پننگک۔ توانائی نا بارواٹی کابینہ کمیٹی اُرائی، صنعتی و واپاری صارف آتے کن ری گیسیفائیڈ لیکیوئڈ نیچرل گیس(آر ایل این جی) آ مبنی پوسکن آ گیس کنکشن تا ہم منظوری ئِ تس۔ توانائی نا بابت کابینہ کمیٹی نا سفارش ئِ پک کننگ کن کابینہ نا بروک آ دیوان اٹی پیش کننگک۔ وزیر خزانہ محمد اسحاق ڈار ، وزیر دیر و بجلی خواجہ محمد آصف ، وزیر ڈٹ بندی و شونداری احسن اقبال ، وزیراعلیٰ پنجاب شہباز شریف و سینئر کمامدارآک دیوان اٹی ساڑی ئسر۔
