آرمی چیف جنرل قمر جاوید باجوہ پاک فوج انا فیلڈ جنرل کورٹ مارشل نا فیصلہ ئِ پک کرے
”را“ بلوچستان و کراچی ٹی امن نا بحالی نا کوشست آتے لتاڑنگ نا زمواری تسوسس، دزگیر بھارتی نیول کمانڈرنا اعتراف
راولپنڈی۔ 10 اپریل (اے پی پی) پاک فوج انا فیلڈ جنرل کورٹ مارشل بھارتی جاسوس کلبھوشن یادیو ئِ سزائے موت بنفینے، آرمی چیف جنرل قمر جاوید باجوہ فیصلہ ئِ پک کرے، کلبھوشن یادیو پاکستان اٹی تخریبی کارروائی تیٹی اوارئس و اواعتراف کریسس کہ اودے بھارتی اودیم ایجنسی را پاکستان آ گدریفیسس۔ پاک فوج انا شعبہ تعلقات عامہ (آئی ایس پی آر) نا ڈائریکٹر جنرل ، میجر جنرل آصف غفور نا ٹویٹ نا رداٹ بھارتی اودیم ایجنسی رانا ایجنٹ، بھارتی بحریہ نا آفیسر نمبر 41558Z کمانڈر کلبھوشن یادیو المعروف حسین مبارک پٹیل ئِ 3مارچ 2016ءآ پاکستان مخالف سرجزآتیٹی اوار مننگ آ بلوچستان نا علاقہ ماشکیل اٹی انٹیلی جنس آپریشن اٹی دزگیر کننگاسس۔ پاک فوج انا فیلڈ جنرل کورٹ مارشل پاکستان آرمی نا ایکٹ (پی اے اے ) نا رداٹ کلبھوشن یادیو ئِ پاہونا سزابنفینے۔ دوشنبے نا دے آرمی چیف جنرل قمر جاوید کلبھوشن یادیو ئِ فیلڈ جنرل کورٹ مارشل نا کنڈآن تروک آ سزائے موت نا فیصلہ ئِ پک کرے۔ بھارتی اودیم ایجنسی رانا ایجنٹ نیول کمانڈر کلبھوشن یادیو نا برخلاف فیلڈ جنرل کورٹ مارشل پاکستان آرمی نا ایکٹ (پی اے اے ) 1952ءنا سیکشن 59 و آفیشل سیکرٹ ایکٹ آف 1923ءنا سیکشن مسٹ نا رداٹ کارروائی عمل اٹی ایس۔ فیلڈ جنرل کورٹ مارشل کلبھوشن سدھیر یادیو ئِ غٹ دوبہ غاتا قصوروار خنا۔ کلبھوشن یادیو مجسٹریٹ و عدالت نا مون آ اعتراف کرے کہ اودے رانا کنڈآن دا زمواری ئِ تننگاسس کہ او جاسوسی، تخریبی کارروائی تے کن ڈٹ بندی و رابطہ غاتے منظم کے تانکہ پاکستان نا کانود نافذ کروک آ ادارہ غاتا کنڈآن بلوچستان و کراچی ٹی امن نا بحالی نا کوشست آتے لتاڑنگ مرے۔ بھارتی جاسوس کلبھوشن یادیو ئِ کانود نا رداٹ تینا دفاع کن کانودی ماہر آفیسر نا خذمت فراوان کننگاسس۔
