پاکستان نا دستور بے پرخ غٹ شاری تا بنداوی حق انا رکھ ئِ کیک
اسلام آباد۔ 10 اپریل (اے پی پی) وزیراعظم محمد نواز شریف پارینے کہ پاکستان نا دستور بے پرخ غٹ شاری تا بنداوی حق انا رکھ ئِ کیک، یوم دستور اڈتننگ نا روایت آن آئین نا بالادستی ئِ برقرار تخنگ نا جوزہ ئِ سوگوی ملک۔ اوداہیت ئِ دوشنبے نا دے یوم دستور نا وخت آ تینا کلہو اٹی پارے۔ وزیراعظم یوم دستور نا وخت آ پاکستانی الس ئِ مبارکبادی پیش کرسا پارے کہ دادے ہمو غٹ شاری و راہشون تا کوشست و کڑدآتے تالان کیک ہراک قومی امنائی نا کمک اٹ دستور سازی کن سخت خواری کریر۔ اوپارے کہ دا دے ہمو غٹ پاکستانی تے ہم خراج تحسین پیش کننگ کن وقت ئِ ہراک جمہوریت و کانود نا حکمرانی کن قربانی تسر۔ وزیراعظم پارے کہ بحیثیت قوم نن بایدے غٹ پہہ مرین کہ ملک انا بڑزکو کانود اثباتی ، ہمہ جہت و بایدے شراکتی مرے۔ دارداٹ ، کنکن داہیت است جمی نا سوب ئِ کہ پاکستان نا آئین بے پرخ غٹ شاری تا بنداوی حق انا رکھ ئِ المی جوڑ کیک و دانا بدولت اسہ سوگو و یکجا بنجاسے نا بنداو ئِ تخک۔ اوپارے کہ داسہ بحیثیت پاکستانی شاری داہیت ئِ المی جوڑ کننگ ننے آ منحصر ئِ کہ نن تینا آئین نا جمہوری ، پارلیمانی و بنجائی نوعیت ئِ مسخ کننگ نا ہر کوشست ئِ سرسہب مننگ کن ہلیپن ۔ وزیراعظم پارے کہ یوم دستور اڈتننگ نا روایت نئے بیرہ آئین نا بالادستی ئِ برقرار تخنگ نا ننا جوزہ غاتے سوگوی ایتک بلکن ننا بروک آ نسل آتے جمہوریت و جمہوری طرز حکمرانی نا اہمیت آن روشناس کننگ نا سوب ہم جوڑ مریک۔ وزیراعظم آئین نا رداٹ پاکستانی الس نا حق و فرض انا عزم انا ازسرنو اعادہ کننگ نا کوشست آتیا سینٹ آف پاکستان ئِ ہم مبارکبادی پیش کرے۔
