اسلام آباد/ننکانہ صاحب۔09 اپریل (اے پی پی) بنجائی وزیر امور کشمیر و گلگت بلتستان چوہدری محمد برجیس طاہر پارینے کہ پاک چین اقتصادی راہداری نا ڈٹ پاکستان تون اوار مچ آ ڈیہہ نا شونہالی نا سوب جوڑ مسنے۔ او ضلع شیخو پورہ نا تحصیل صفدر آباد نا نواحی خلق ڈپٹی وال اٹی گیس فراوانی نا وخت آ الس آن تران کریکہ۔ اوپارے کہ پاک چین اقتصادی راہداری نا ڈٹ محمد نواز شریف نا ہمو وژن نا تخلیق ئِ ہرادے او اینو آن اِرا دہائی آن وخت مست موٹروے نا دروشم اٹی بناءکریسس۔ اوپارے کہ 1990 ءنا دہائی ٹی محمد نواز شریف موٹروے ڈٹ نیامی ایشیائی ریاست آتسکان رسینگ نا نظریہ آن بناءکریسس ہرادے بدقسمتی آن پد انا حکومت آک جاری تختوس۔ اوپارے کہ اینو روس و برطانیہ تون اوار نیامی ایشیائی ریاست آتا دا تاریخ ساز ڈٹ اٹی زیات است خواہی ہلنگ دا ہیت انا عکاسی ئِ کیک کہ محمد نواز شریف نا وژن و نظریہ نا لحاظ آن دا مچ آ ڈیہہ ٹی ہچ ئُ لیڈر اس اونا ثانی اف۔ اوپارے کہ محمد نواز شریف نئے بیرہ پاکستان ئِ شونداری کن پاک چین اقتصادی راہداری نا دروشم اٹ اسہ کسر اس نشان تس بلکن او دا ڈیہہ ٹی ارب آ بندغ آتا زند آتیٹی شونداری و شونہالی نا پوسکن ئُ اُفق اس درستی راستی کرفینے۔
