اسلام آباد۔ 09 اپریل (اے پی پی) بنجائی وزیر ڈٹ بندی و شونداری احسن اقبال پارینے کہ اقتصادی راہداری پاکستان نا بارواٹی دنیا نا رائے تے بدل کرینے ہلانے۔ 2013 ءآن مست ننا مخالف آک ننے خطرناک ملک اس گوندنگ آ توانائی تے خڑچ کریرہ ، اینو پاکستان نا بدخواہ سی پیک نا سرسہبی ئِ توننگ کن شکوک ودی کننگ خوائنگ ئُ۔ گوادر ڈیہہ ٹی شونداری نا جاگہ اس جوڑ مرسا مون آ بننگ ئِ ۔ سی پیک ترندی اٹ حقیقت اٹ بدل مننگ ئِ۔ سی پیک نا برخلاف ہچ ئُ چمب اس سرسہب مننگ کپک۔ داخیال آتا درشانی ئِ او بلوچستان آن بروک آ پارٹی و ورناتا ڈل آتون ہیت وگپ کرسا کرے۔ احسن اقبال پارے کہ پاکستانی قوم سی پیک نا رکھ اکن مخ ئِ تفینو ، تاریخ اٹی اولیکو وار بلوچستان نا الس احساس محرومی تے چٹفسا خننگ انگ ئِ۔ بلوچستان نا طول و عرض اٹی شونداری ڈٹ و روڈ آتا جال اس شاغنگ آن ہموجاگہ نا الس قومی دنگ انا بشخ جوڑ مسنو۔ گوادر اٹی جہانی معیار نا یورنیورسٹی نا اڈتننگ آن دا چار تعلیمی پٹ اٹی ہم دنیا نا چکار نا بنجا جوڑ مریک۔ ہمودے مر اف ہراتم پاکستان و ایلو ملک آتیان طالب علم و پروفیشنلز گوادر یونیورسٹی ٹی تعلیم و کسبی تربیت دوئی کننگ کن بریرہ۔ اوپارے کہ سی پیک نا مزل پاکستان اٹی صنعتی انقلاب نا کسر ئِ ہموار کننگ وپاکستان ئِ واپاری و پیداواری بنجاسے ٹی شاغنگ نا ئِ۔ توانائی ، انفراسٹرکچر ، بندرگاہ نا ڈٹ آک پاکستان اٹی صنعتی انقلاب نا بنداو تخرہ۔ ہمودے مر اف ہراتم میڈان مچ آ پاکستان اٹی معیار نا علامت سرپند کننگک۔ احسن اقبال نا پاننگ ئس کہ چین 85 ملین روزگا رنا وارخواہی کم پیداواری لاگت نا ملک آتے گدریفنگ ئِ، سی پیک نا کمک اٹ نن دا نا بھلو بشخ اس دوئی کننگ کینہ۔ الس و تعلیم یافتہ بندغ آک ہوکاتیا خف توننگ آن بیدس دا وارخواہی تیان زیات آن زیات فائدہ ہرفنگ آ چکار تخر۔ اودا تاثر نا سختی اٹ تردید ئِ کرے کہ سی پیک اٹی صوبہ بلوچستان و خاص کر گوادر نا شاری تے اقلیت اٹی بدلیفنگک ۔ اودوٹوک وڑاٹ صفا کرے کہ بلوچستان نا وسیلہ غاتیا ہموجاگہ نا خلقت نا بنداوی حق ئِ و حکومت مچ آ صوبہ نا الس نا معاشی ، راجی ، کانودی و ہر لحاظ اٹ رکھ ئِ المی جوڑ کیک۔ احسن اقبال پارے کہ گوادر ئِ جدید ترین پورٹ سٹی اس جوڑ کننگ کن ماسٹر پلان آ کاریم نا بناءمسنے۔ ہمودے مر اف ہراتم گوادر دنیا سنگاپور، ہانگ کانگ و دبئی آنبار مچ آ دنیا نا زرکار و واپاری تنظیم آتا بنجاءجوڑ مریک۔ گوادر اٹی پوسکن آ ایئر پورٹ نا جوڑ جاڑ اینخوسال اٹی بناءکیک۔ گوادر آن کوئٹہ و گوادر آن رتو ڈیرو شاہراہ تا پوروی بلوچستان ئِ شونداری تون گنڈنگ اٹی کلیدی کڑد ادا کننگ ئِ۔ سی پیک آ غٹ صوبائی حکومت آک بنجائی حکومت تون اواری اٹ کاریم کننگ ئُ۔ گوادر یونیورسٹی کیمپس انا بناءکننگانے۔ سی پیک پاکستانی بزنس کن تاریخی ئُ وارخواہی اس ایسونے۔ نجی بشخ انا فرض ئِ کہ سی پیک آن فائدہ ہرفنگ نا پبی تیاری ئِ کے۔ صنعتی زون تیٹی پاکستانی تے روزگار ملک۔ مسہ سال اٹی سی پیک معاہدہ ئِ کاغد آن ارب آ ڈالر نا زرکاری ٹی بٹنگ چنکو سرسہبی اس اف۔ سی پیک نا دشمنک پاکستان نا دشمنک ئُ۔
