اسلام آباد۔ 09 اپریل (اے پی پی) وزیراعظم نا سلاہکار تہوبازی سردار مہتاب احمد خان نیو اسلام آباد بالی پٹ انا دورہ ئِ کرے و ڈائریکٹر جنرل سول ایوی ایشن ایئر مارشل (ر) عاصم سلیمان تون نیو اسلام آباد بالی پٹ انا بنانا رداٹ کسبی تیاری تا بابت بریفنگ ہلک۔ وزیراعظم نا سلاہکار تون اوار سیکرٹری تہوبازی عرفان الٰہی ہم ئس۔ وزیراعظم نا سلاہکار پارت کرے کہ سول ایوی ایشن اتھارٹی ئِ مرے کہ پوسکن آ بالی پٹ آن آپریشن نا سرسہب بناءکن گچین وڑاٹ غٹ کاریم تے پور و کے۔ اواست جمی نا درشانی ئِ کرے کہ پوسکن آ اسلام آباد بالی پٹ پوسکن آ جہانی معیار نا آسراتی تا حامل ملک انا اولیکو بالی پٹ مریک۔ اوپارت کرے کہ ملک انا ایلو بالی پٹ آتے ہم پوسکن جوڑ کننگے و اوفتے پوسکن آ ٹیکنالوجی و ازباب آتیان لیس کننگے۔ اوکمامدار آتے پارت کرے کہ سول ایوی ایشن اتھارٹی بالی پٹ آتیا کاروباری سرجزآتیٹی ودکی نا کمک اٹ پین محصولات ودی کے۔ اوسول ایوی ایشن نا ڈائریکٹر جنرل تون پارے کہ پوسکن آ بالی پٹ انا دنگ اٹی دستیاب ڈغار و آبی وسیلہ غاتے کاریم اٹ اتسا اسہ سیل و سواتی پارک اسے نا اڈتننگ ئِ عمل اٹی اتے، ایئر لائنز ، گراﺅنڈ ہینڈ لرز، بالی پٹ سیکورٹی فورس، انسداد منشیات فورس، ایف آئی اے و کسٹم کمامدارکون آ ایلو اسٹیک ہولڈرز آتون اوڑدہی ٹی او سول ایوی ایشن اتھارٹی ئِ پارت کرے کہ پوسکن آ بالی پٹ آ اونا بروخت آپریشن کن اودے پبی کمک فراوان کننگے۔ ایسر اٹی سردار مہتاب احمد خان بالی پٹ انا چندی بشخ و شعبہ غاتا دورہ ئِ کرے و کاریم نا پیش رفت آ است جمی نا درشانی ئِ کرے۔
