اسلام آباد۔ 09 اپریل (اے پی پی) اسپیکر قومی اسمبلی سردار ایاز صادق پارینے کہ آئین نا بالادستی ننا مزل مقصود ئِ ، آئین ریاست نا ہر شاری ئِ بنداوی حق، جمہوریت و سیکورٹی نا ضمانت ایتک دانا تقدس ئِ برقرار تخنگ ننا غٹ انا اولین زمواری ئِ۔ اوداخیال آتا درشانی ئِ یوم دستور نا وخت آ قوم انا پن تینا کلہو اٹی کرے ہرا مچ آ ملک اٹی اینو(دوشنبے نا دے) اڈ تننگ انگ ئِ۔ اسپیکر قومی اسمبلی آئین نا تاریخی اہمیت ئِ مون آ تخسا پارے کہ 44 سال مست ملک انا اولیکو جمہوری وڑاٹ گچین مروک آ مقننہ نا نمائندہ غاک ملک ئِ جمہوریت و امن و شونداری نا کسر آ روان کننگ کن امنائی وڑاٹ آئین پاکستان نا منظوری ئِ تسر۔ اواست ہسونی نا درشانیئِ کرسا پارے کہ گدرینگوک آ 44سال اٹی غیر جمہوری واک آک جمہوری وڑاٹ گچین مروک حکومت آتے چٹفسا آئین ئِ معطل کریر ہرانا سوب آن سو گو بنجائِ دھچکا لگا دا غیر جمہوری گام گیج آتیان ملک اٹی جمہوری کلچر سیکورٹی، انسانی حق و شونداری آ ہم منفی زئم تما۔ جمہوری واک آتا ملک اٹی جمہوریت نا بحالی و آئین نا بالادستی کن قربانی تا ذکر ئِ کرسا اسپیکر پارے کہ آئین نا بحالی کن جمہوری واک آک آمریت اٹی بے پناہ مصائب آتا باوجود آئین و جمہوریت نا بحالی کن تینا کوشست آتے برجاتخار۔ او آئین نا بالادستی و جمہوریت نا بحالی کن قربانی تروک آ گمنام ہیروتے خراج تحسین پیش کرسا پارے کہ دا جمہوریت نا گمنام ہیروک آئین نا تقدس کن آمرآتا کنڈآن نئے بیرہ کوڑہ کُنگر و قیدوبند نا صعوبت آتے سگار بلکن پاہواسکان امنا کریر۔ اسپیکر پارے کہ ساڑی سیاسی سروک نا زمواری ئِ کہ او آئین آ عملدرآمد کرسا بنجائی اکائی تے آئین اٹی تروک آ واک و شاری تا بنداوی حق انا رکھئِ المی جوڑ کے۔
