وزیر خزانہ نا کماشی ٹی دیوان، سیکورٹیز اینڈ ایکسچینج کمیشن نا معاملہ، کاروباری برادری نا بجٹ سلاہ نا جاچ ئِ ہلنگا
اسلام آباد۔ 09 اپریل (اے پی پی) بنجائی وزیر خزانہ سینیٹر محمد اسحاق ڈار نا کماشی ٹی اسہ دیوان اس مس ہراٹی سیکورٹیز اینڈ ایکسچینج آف پاکستان (ایس ای سی پی) نا معاملہ و کاروباری برادری نا بجٹ نا سلاہ نا جاچ ئِ ہلنگا۔ یک شنبے نا دے وزارت خزانہ ٹی اڈ ہلوک آ دا دیوان اٹی سیکرٹری خزانہ، سیکرٹری اقتصادی امور ڈویژن، ایس ای سی پی نا چیئرمین و تعلقدار وزارت آتا بڑزکو کمامدارآک ساڑی ئسر۔ دیوان اٹی بجٹ نا تیاری آ ہم خیال آتا درشانی کننگا۔ داوخت آ ایس ای سی پی نا چیئرمین اصلاحات نا گام گیج آتا بابت بنجائی وزیر ئِ پارے۔ اوپارے کہ حکومت نا کنڈآن کروک آ کانود سازی نا گام گیج آتیان کاروباری برادری ئِ فائدہ مریک۔ اونا پاننگ ئس کہ کمیشن کاروباری برادری نا بجٹ تجاویز نا دوئی کن اوڑدہی کننگ ئِ۔ وزیر خزانہ پارے کہ لس بندغ نا شونداری و شرحالی حکومت نا اولیت ئِ۔ حکومت نا کنڈآن درستی راستی کرفوک اصلاحات پروگرام نا مسخت کاروباری و پوریاگر برادری ئِ آسراتی فراوان کننگ نائِ۔ اونا پاننگ ئس کہ حکومت کاروباری برادری ئِ جہانی معیار نا آسراتی فراوان کننگ کن پرعزم ئِ و ساڑی گام گیج آتامسخت ہم ہندادے۔ سیکرٹری خزانہ وزیر ئِ پارے کہ تعلقدار ڈویژن ایس ای سی پی تون اواری اٹ کاریم کننگ ئِ تانکہ بجٹ نا تیاری آن مست غٹ شریدار آتا سلاہ تے ہلنگ مرے۔ وزیر خزانہ پارے کہ حکومت گدرینگوک آ چار سال آنبار اینخو سال ہم بجٹ نا تیاری کن غٹ شریدار بشمول کاروباری و پوریاگر برادری نا سلاہ تا روشنی ٹی شونداری پروگرام تا ہدف آتا تعین ئِ کیک۔
