اسلام آباد۔ 20 اکتوبر (اے پی پی) وزیراعظم نا سلاہکار احتساب و داخلہ بیرسٹر شہزاد اکبر پارینے کہ شریف خاہوت نا جعلی ٹی ٹیز نا غٹ ٹرانزیکشن و 25 ارب روپئی نا منی لانڈرنگ اسحاق ڈار دور اٹی مس، اسحاق ڈار ءِ اگہ زرس ہمت ہم ارے تو کنا برخلاف دعویٰ دائر کے، کنا خبر ءِ کہ اسحاق ڈار الطاف حسین آنبار اینو پگہ برطانیہ ٹی سیاسی پناہ ٹی رہینگ انگ ءِ، اسحاق ڈار ہم نواز شریف آنبار وزٹ ویزہ غا برطانیہ غا ہناسس، مسہ سال مسنے ولے او پدی بفننگ ءِ، صحافیک اوڑآن سوج کیر کہ اونا برطانیہ ٹی داوخت آ انت کانودی حیثیت ءِ، نروک آ بندغ برطانیہ ٹی تولوک ءِ و داڑے سینیٹر ءِ ہرا ننا نظام انصاف تون اسہ مسخرہ اسے، اسحاق ڈار اسُل معافی خواتنوٹ، نروک و عدالت آن نروک بندغ آن انت اکن معافی خواو، کنے تو سمااف لندن اٹی کنا برخلاف کیس کننگاسس۔ نجی ٹی وی چینل ءِ تدوک آ دے انٹرویو ترسا اوپارے کہ دروغ تڑنگ شریف خاہوت نا عادت جوڑ مسنے ، درو مریم پاریکہ کہ شہباز شریف انٹرنیشنل صادق و امین مسنے، کنا خیال ئس کہ شہباز شریف احتساب عدالت نا مون آ پیش مرسا فیصلہ ءِ پیش کیک ولے و احتساب عدالت ءِ پارے کہ کنے اسلام آباد آ ہنوئی ءِ۔ بیرسٹر شہزاد اکبر پارے کہ فنانشل مانیٹرنگ یونٹ( ایف ایم او) نا کاریم ءِ کہ اکاؤنٹ اسے ٹی پیسہ برے، شکبر ٹرانزیکشن و منی لانڈرنگ نا شبہ ٹی تعلقدار ادارہ غاتے رپورٹ کے، اسحاق ڈار ہراتم وزیر خزانہ ئس تو اونا دور اٹی شریف خاہوت نا جعلی ٹی ٹیز ٹرانزیکشن و منی لانڈرنگ مس ہرا عدالتی دستاویز آتا بشخ ءُ، رمضان شوگرملز، ایلو ٹرانزیکشن تاتاریخ ءِ ہبو او اسحاق ڈار نا دور انا ءُ۔ ایف ایم او ہمووخت آ انت اکن رپورٹ کتو؟۔ اوپارے کہ اسحاق ڈار برطانیہ غان ایس ای سی پی ءِ ہرالیٹرآک بسرہ اوفتے ڈکارہ و اودے پین جاست وپاست آن توریرہ۔
