اسلام آباد۔ 14 اکتوبر (اے پی پی) بنجائی وزیر خزانہ شوکت ترین پارینے کہ پاکستان و جہانی مالیاتی فنڈ(آئی ایم ایف) نا نیام اٹ 6 ارب ڈالر نا ودکی فنڈ آسراتی (ای ایف ایف) کن بڑزکو کہول انا مذاکرات نا سرسہب نتیجہ غاتا اومیت ءِ، پاکستان نا زرگزران مالی سال 2021-22اٹی 5 درسد آن زیات شون ہلیک، اسہ اڑاند اس ہم پاکستان ءِ دُوارہ زرگزرانی وڑاٹ عظیم کننگ، اولیکو ایشیا و ولدا دنیا نا چوٹی نا 10 بھلا زرگزران تیٹی اوار مننگ آن توننگ کپک، ساڑی بھارتی حکومت جموں و کشمیر نا جھیڑہ ئی حیثیت ءِ امنا کپننگ ءِ۔ داخیال آتا درشانی ءِ او پنچ شنبے نادے آ واشنگٹن اٹی یوایس انسٹی ٹیوٹ آف پیس(یوایس آئی پی) اٹی ’’پاکستان نا اقتصادی آخبت‘‘ نا سرحال آ گپ وتران کرسا کرے۔ اوپارے کہ آئی ایم ایف تون مذاکرات نا ششمیکو دور اونا امریکہ نا دورہ نا غٹ آن اہم ءُ بشخ اسے۔ اوپارے کہ اونا حکومت تکک کہ آئی ایم ایف نا کنڈآن بجلی نا نرخ آتیٹی ودکی نا خواست آن افراط زر انا کچ ہم ودک۔ اومستی پارے کہ دا ٹک فنڈاتون تیکنیکی گپ وتران اٹی چست کننگاسس، ہراٹی داہم پاننگاسس کہ ٹیرف اٹی ودکی پدریسہ کننگک تانکہ افراط زر آ اسہ دم اتون اثرتمپ۔ اوپارے کہ بجلی نا بشخ اٹی گڑاس ویل ئسر، ہرافتے ٹی گرج آن زیات پیدواری لائخی ہم اوار ئس، ہراڑکن حکومت ءِ زرتروئی تما، ڈسٹری بیوشن و جنریشن کمپنی تا کارکڑد ءِ ہم گچین کننگ انگ ءِ۔ اوپارے کہ داوخت آ آئی ایم ایف تون سرسہبی اٹ گپ وتران مننگ ءِ۔ اوپارے کہ 1960 انا دہائی ٹی پاکستان نا زرگزران ایشیاٹی چارمیکو بھلا زرگزران ئس ولے ذوالفقار علی بھٹو نا ادارہ غاتے قومیانہ نا پالیسی و 1979 اٹی اوغان جنگ ننا زرگزرانی شونداری ءِ زہمی کرے۔ اوپارے کہ وزیر اعظم عمران خان اسہ ہندن ءُ زرگزران اسے سنبھالا ہرا 2018 ٹی 20 بلین ڈالر نا کرنٹ اکاؤنٹ نسخان، بھلو زری نسخان اتون چلینگاکہ ولے حکومت زرگزران نا گچینی کن اولیتی بنداو تیا گام گیج کرے ہرانا دوررس بھرم مون آ بننگ بناکرینے۔ اوپارے کہ کوویڈ۔ 19 نا دین دنیا ءِ تینا پلویڑاٹی ہلک، ولے حکومت گچین حکمت عملی اتون دا دینی مرض انا مقابلہ ءِ کرے ہرانا دنیا بھاز ستاءِ کرے۔ اوپارے کہ حکومت کوویڈ۔ 19 اٹی اِراپیدواری بشخ، کشت وکشار و صنعت تون اوار اوار ہاؤسنگ نا بشخ اٹی زرکاری کن پروگرام بناکرے ہراڑآن ملک اٹی بیروزگاری ٹی کمتی بس و ملکی زرگزران ءِ سوگو ملانے۔ اوپارے کہ مالی سال 2021ٹی شرح نمو 4 درسد آن زیات ریکارڈ کننگا ہراکہ تدوک آ سال منفی نصف درسد نا شرح نمو نا مقابلہ ٹی ئس، ہراڑآن ’’وی۔شکل‘‘ نا بحالی ظاہر مریک۔ اوپارے کہ ملک اٹی 60 درسد آبادی نا وئی 30 سال آن کم ءُ ہرافتے ملازمت آتا گرج ءِ، ہنداخاطرآن حکومت کشت وکشار، صنعت، برآمدات و ہاؤسنگ نا بشخ آتے بحال کرے و یخین ءِکہ زرگزران 5 درسد سالانہ آن زیات نا کچ اٹ شون ہلیک۔ اوپارے کہ حکومت داہیت ءِ پک کننگ ءِ کہ پسماندہ بندغ آتے گوجالنگپ و اوفتے مثبت اقتصادی شونداری نا اثرآتا بڑزآن شیف (ٹرکل ڈاؤن) بننگ اسکان انتظار کروئی تمپ ہرا کیہی عشرہ غاتسکان اوفتسکان سرمتنو۔ چنانچہ حکومت پائیدار و جامع شونداری ءِ پک کننگ کن شیف آن بڑز انا (باٹم اپ) پالیسی اس تینا کرے۔ دامسخت کن حکومت ہیلتھ کارڈ آتا جاری و 40 لکھ اُراتا کمک ءِ کننگ کن ٹیکنیکل ٹریننگ تننگ آن بیدس بزغر و کم کٹیا والا خاہوت آتے بے سود وام فراوان کننگ ءِ۔
