اسلام آباد۔ 28 ستمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ وزیراعظم ہندی حکومت آتا سوگو نظام آ یخین تخک، واکدار بلدیاتی حکومت آتا نظام پاکستان نا ویل آتا ایسر ءِ، آرٹیکل 140اے انا نفاذ مفننگ غٹ آن بھلا ویل ءِ، لوکل گورنمنٹ نظام مفننگ نا سوب آن صوبہ غاتا پیسہ غاک بریبری نا بنداو آ ضلع غاتے ٹی خڑچ مفسہ، پوسکن آ جمہوریت اٹ شیف آن بڑزانا کنڈآ ہُروئی مریک، ننا شارتے ٹی بنداوی ویل گورننس نا ءِ، ہراتم اسکان نن تینا سوچ ءِ بدلیفپنہ ملک شون ہلنگ کپک، صوبہ غاتے ٹی پروونشل فائنانس کمیشن ایوارڈ مفننگ نا سوب آن ضلع غاتیٹی غاوبریک، اسلام آباد اٹی تولسا کراچی نا ویل آتے ایسر کننگ مفک۔ داخیال آتا درشانی ءِ او سے شنبے نادے آ ہندی حکومت آتا بابت قومی کانفرنس آن تران کرساکرے۔ وزیرحوالکاری پارے کہ وزیراعظم عمران خان داہیت آ یخین تخک کہ ہندی حکومت آتا سوگو نظام آن بیدس ملک انا نظام سہی مننگ کپک۔ اوپارے کہ تاریخ ءِ ہُرن تو مطلق العنان بادشاہت آن جہوریت نا کنڈآ سفر درجہ بدرجہ طے مس، 1216ء آن 1226ء اسکان میگنا کارٹانا دور آن پد پوسکن آ جمہوریت مون آ بس، ہندوستان اٹی 1857ء اسکان جنگ آجوئی مس، ہمووخت آ بادشاہ ءِ ذی السبحانی پاننگاکہ، حکومت و مخلوق ذی السبحانی نا کنڈآ ہُرارہ۔ وزیرحوالکاری پارے کہ 16 می آن 17 می صدی ٹی پوسکن آ جمہوریت بس، بل آف رائٹس منظور مس ہراٹی پاننگاکہ خراج ناپیسہ غاتے بادشاہ تینا مرضی اٹ خڑچ کننگ کپک، خراج خلنگ نا اختیار گچین مروک آ نمائندہ غاتیان بیدس مفک، خراج ہمووخت آ لگک ہراتم الس نا گچین مروک آ نمائندہ غاک موکل ایترہ، داجمہوریت نا بنا17می صدی آن برطانیہ ناپارلیمان آن مس، ہنداوڑ بادشاہ نا واکداریک کم مرسا کریر۔ اوپارے کہ ہندی حکومت آتا نظام نا پوسکن آ دروشم اٹ الس واکدار مرسا کرے، پوسکن آ جمہوریت اٹ شیف آن بڑزانا کنڈآ ہروئی مریک، داڑکن ہندی حکومت آتا نظام گچین ءُ نظام اسے۔ اونا پاننگ ئس کہ 2006ء ٹی ہندی حکومت آتا نظام بناکرے تو اوٹی اسہ خامی اس دائس کہ صوبہ غاتاواکداری تے گدریفنگا ولے بنجانا واکداری تے گدریفنگتو، صوبہ غاتے تشنگی سلیس کہ اوفتے تون تو ہچ اس اف، ولدا 18 می ترمیم نا رداٹ صوبہ غاتا گدریفنگوک آ واکداری تے شیف آن بڑز گدریفنگا، ہنداوڑ واکداری تا گدریفنگ نا ہرافائدہ مروئی ئس او مننگ کتو۔ اوپارے کہ گورننس اٹی غٹ آن بھلا ویل آرٹیکل 140اے آ عملدرآمد مفننگ ءِ، داآرٹیکل (140اے) انا رداٹ مچ آ پاکستان آن خراج یکجا مرسا بنجاغابریک و بنجائی حکومت نا کنڈآن 60 درسد خراج صوبہ غاتیاکاہک، 23 سال اٹی بیرہ پنجاب ءِ کم و ود 2300آن 2400 ارب روپئی گدریفنگا، سندھ ءِ کم و ود 1700 ارب روپئی ہنا، بلوچستان نا آبادی فیصل آباد ڈویژن نا آبادی ناخڑک ءِ ، اودے کم وود 700 ارب روپئی ہنا، ہنداوڑ خیبرپختونخوا ٹی کم وود 900 آن 1000ارب روپئی ہنا۔ اوپارے کہ ہندی حکومت آتا غٹ آن بھلا مخالفت چیف مسٹرآتا کنڈآ بننگ ءِ۔ اوپارے کہ اسہ ویل اس دا مون تروک ءِ کہ بنجائی حکومت آن پیسہ صوبہ غاتے گدریفنگ آن پد چیف منسٹر آفس اٹ اختہ مریک، ارٹ میکوویل دادے کہ ایم این ایز و ایم پی ایز راضی افس کہ او پولیس، ٹھیکیدار و پٹواری آن بڑز سوچ تخر۔ اوپارے کہ ہراتم اسکان نن تینا سوچ ءِ بدلیفپنہ ملک شون ہلنگ کپک۔ اوپارے کہ سندھ اٹی اسہ کنڈآ 1700 آن 1800 ارب روپئی این ایف سی ایوارڈ نا مد اٹ تننگا ولے کراچی ٹی سندھ حکومت اسہ روپئی اس خڑچ کپک ہموجاگہ نا مخلوق پاہک کہ نن پی ٹی آئی ءِ وونٹ تسونن، بنجائی حکومت 1100 ارب روپئی خراچی آ خلک۔ اوپارے کہ اسلام آبادآن تولسا کراچی نا ویل آتے ہراوڑ ایسر کننگ مریک، دانا اسٹ انگا ایسر ہندی حکومت آتا نظام ءِ۔
