اسلام آباد۔24ستمبر (اے پی پی): مزن وزیر عمران خان ءَ گوشت کہ پاکستان اسلامی گہبودی ریاست جوڑ بوھگ ءِ کشک ءَ رھادگ اِنت، حکومت ءَ چاگرد ءِ ھمزوریں تبک ءُ لس مردم ءِ گہبود ءِ واستہ پروگرام سہرا کنائینتگ، ما دُزئی کنوک آنی کیاسگری ءِ گپ ءَ کناں ھمے واستہ مئے ھلاپ کنوک جاک ءُ کوکار ءَ اَنت، مارا آزاتیں آمید گس ءُ میڈیا ءَ گوں اچ جیڈھ نیست، گوستگیں حکومت ءَ میڈیا ءَ را ایرا گری ءِ پڑ ءَ انکیاس آزاتی نہ داتگ، پروپیگینڈا آنی وسیلگ ءَ مزن وزیر ءَ بے شرپ کنگ بوتگ ءُ بھتام بندگ بوتگ، میڈیا ءَ 70 درسد پروگرام ءُ ھال مئے ھلاپ ایگ انت، ورنا نوکیں آئیڈیا بیار انت، حکومت سرجمیں رنگ ءَ سپورٹ کنت۔ اے ھیالانی درشانی آئی ءَ آدینگ ءِ روچ ءَ ڈیجیٹل میڈیا ڈیولپمنٹ پروگرام ءِ چیر دستی ءَ ورنا آنی واستہ ڈیجیٹل میڈیا انٹرن شپ ءِ بنگیجی مراگش ءَ گشتانک دیان ءَ کت۔ اے موہ ءِ سر ءَ بنجاھی وزیر اھوالکاری ءُ شنگکاری چوہدری فواد حسین ھم ساڑی ات۔ مزن وزیر ءَ گوشت کہ اے پروگرام ءِ بنگیج وشیں گپ ات، ورنا مئے ملک ءِ آیوکیں باندات انت، ایشاناں لوٹ ایت کہ آ وتی ازم ءَ را جوانیں رنگ ءَ سہرا بکن انت ءُ اچبر وتارا کس ءَ چہ کمتر مہ پھم انت۔ مزن وزیر ءَ گوشت کہ آئی ءَ کرکٹ ءَ بازیں سکی ءُ مشکلا آنی گوما دیم پہ دیمی کتگ بلے اچبر ہار نہ من اتگ ءُ کوشست ءَ را جاڑی داشتگ، آئی ءَ گوشت کہ اللہ پاک ءَ بنی آدم ءَ را درستاں چہ جوانتریں ساھ دار جوڑ کتگ، ٹوھیں واب گند گ ءُ ایشانی واستہ سکیں محنت کنوک ٹوھیں مردم جوڑ بنت ھما کہ سکیں ساھت آں چہ نہ تُرس انت۔ مزن وزیر ءَ گوشت کہ دگنیا ڈیجیٹل ءِ نیمگ ءَ جنزگ ءَ انت ءُ آیوکیں دور ءُ باریگ ڈیجیٹل ایگ انت، ورنا وتی ازمکاری آنی کارمرزی ءَ کنان ءَ ٹوھیں سیم سر آنی در جنگ ءِ واستہ کوشست ایگ بہ بنت ءُ وتی سسا ءَ را برز ءُ بلند بکن انت۔ آئی ءَ گوشت کہ دگنیا ءَ دو نمونگ ءِ بنی آدم بیت یک اِت ھما کہ ایوک ءَ وتی باروا سسا کنت دومی ھما کہ وتی ملک ءُ بنی آدم آنی واستہ سسا کنت۔ آئی ءَ گوشت کہ دگنیا ھما مردم آناں یات کنت ھما کہ بنی آدم آنی واستہ کار کنت۔ مزن وزیر ءَ اینٹرن شپ در جنوکیں ورنا آناں زور دات کہ آ پاکستان ءِ وژن ءُ مول ءُ مراد آناں دیم ءَ بہ جنزین انت۔
