طالبان ایمنی ءِ واستہ  امریکہ ءِ شرکدار  بوت کناں، امریکہ اوگانستان ءَ نوکیں حکومت ءِ گوما یکجائی ءَ سیت ءُ دمگی برجائی ءَ را دیمروئی دات  کناں، عمران خان

اسلام آباد۔24ستمبر  (اے پی پی): مزن وزیر عمران  خان ءَ گوشت کہ طالبان ایمنی ءِ واستہ مریکہ ءِ شریکدار بوت کنت، امریکہ اوگانستان ءَ نوکیں حکومت ءِ گوما یکجائی سیت ءُ دمگی برجائی ءَ را دیمروئی دات کنت، اوگانستان ءَ را  کشاں چیل ءُ پیسریگیں حکومت ءِ ناکامی آنی سبب ءَ بنی آدمی ڈکالی ءِ  گوما  دیم پہ دیمی انت،  ایمنیں اوگانوستان پاکستان ءِ سیت ءِ واستہ المی انت۔  ایشی ءَ چہ تجارت ءُ دیمروئی منصوبگ آنی کشک پچ بنت۔ چیل سال آنی جنگ ءُ کشاں چیل ءَ اوگانستان ءِ معیشت ، چاگرد ءُ سیاست ءِ سر ءَ  ھرابیں رند پد  نکش کتگ،  امریکہ ، چین  ءُ روس درستاناں یکجای ءَ اوگانستان ءِ نوک سر جوڑیشت ءَ بھر  زورگی انت۔ اوگانستان ءِ  ایندگر ھمساھگیں ملک آںی گوما نوکیں اوگان حکومت ءَ را منگ ءِ پیسلہ کنگ بوتگ، بھارت امریکی سٹریٹجک سیت ءِ سرجمی ءِ واستہ اچبر  چین ءِ گوما  مقابلہ کت نہ کنت۔ آدینگ ءِ روچ ءَ نامداریں امریکی میگزین  ’’نیوز ویک‘‘ ءَ  گلگدار دیان ءَ مزن وزیر ءَ گوشت کہ  امریکی ارد آنی در کپگ ءَ چہ پد طالبان آں گوستگیں 40 سال ءَ چہ اولی رند ءَ سرجمیں ملک ءِ  کنٹرول زرتگ، ایشی ءَ چہ سرجمیں اوگانستان ءِ سیکورٹی برجا کنگ ءِ امیت پیداک بوتگ۔ آئی ءَ گوشت کہ اوگانستان ءِ پیسریگیں حکومت آناں ناکام کنگءِ سبب  ءَ چہ بنی آدمی ڈکالی ءِ گوما دیم پہ دیمی بوتگ،   ایشرا درستاں چہ  پیسر گیوار کنگ لوٹ ایت۔