اسلام آباد۔24ستمبر (اے پی پی): وزیر ءِ درئی کار شاہ محمود قریشی ءَ گوں امریکی وزیر ءِ درئی کار اینٹونی بلنکن ءَ گوں گند ءُ نند کتگ ایشی ءِ توک ءَ دو نیمگی وت مہ وتی یکوئی ءُ اوگانستان ءِ سہرا بوھوکیں جاور ھال آنی سر ءَ ھیال ریچی کنگ بوت۔ پاکستانی سفارتخانہ ءِ نیمگ ءَ جاڑی بوتگیں پریس ریلیز ءِ رد ءَ وزیر ءِ درئی کار شاہ محمود قریشی نیویارک ءَ یونائیٹڈ نیشن ءِ جنرل اسمبلی ءِ 76 دیوان ءِ موہ ءَ پنچ شمبے ءِ روچ ءَ وتی امریکی ھمکار انٹونی بلنکن ءَ گوں گند ءُ نند کتگ، شاہ محمود قریشی ءَ گند ءُ نند ءَ اے گپ ءِ درشان کت کہ پاکستان ءُ امریکہ ءِ نیام ءَ یکوئی مدام سوبمند بوتگ انت ءُ زربارئی ایشیا ءَ برجائی ءِ واستہ سیت مند سہرا بوتگ انت۔ گپ ءُ تران ءِ ساھت ءَ آواں تجارت ، سرمایہ کاری، ھاٹیگ ءُ دمگی رابطہ آنی بنیات ءَ پاکستان ءُ امریکہ ءِ گوما یکوئی ءِ واھشت آںی درشان کت۔ وزیر ءِ درئی کار شاہ محمود قریشی ءَ اوگانستان ءَ یک ٹوھیں سیاسی گیواری ءِ واستہ کوشست آناں آسان جوڑ کنگ ءِ واستہ پاکستان ءِ جزم ءِ ھم درشان کت۔
