وزیراعظم عمران خان نا کماشی ٹی ملک شونداری نا کنڈآ ہِننگ ءِ، پیشن نا زرکاری آن پوسکن ءُ صنعتی زون جوڑ مننگ ءِ، صدر عارف علوی نا چینی زرکاری آن جوڑ چیلنج ٹیکسٹائل فیکٹری نا دورہ غا تران

لاہور۔ 24ستمبر (اے پی پی) صدر مملکت ڈاکٹر عارف علوی پارینے کہ وزیراعظم عمران خان نا کماشی ٹی ملک شونداری نا کنڈآ ہِننگ ءِ و پیشن نا زرکاری آن ملک اٹی پوسکن ءُ صنعتی زون جوڑ مننگ ءِ، حکومت صنعتی انقلاب آ یخین تخک، کورونا غان مچ آ دنیا زہمی مس ولے پاکستان اودے بھلو حداسسکان توننگ اٹ سرسہب مس۔ دنیا ءِ داوخت آ مون آ بروک آ پوسکن آ پاکستان نا گرج ءِ وخت اس کہ اقتصادی وڑاٹ اسہ ملک اسے ہم تنیا کننگ مفک۔ اوجمعہ نادے آ لاہور اٹی چینی زرکاری آن جوڑ چیلنج ٹیکسٹائل فیکٹری نا دورہ نا وخت آ تران کریکہ۔ چیلنج ٹیکسٹائل فیکٹری نا ایم ڈی کیرن چن و پاکستانی پوریاگر قمر خان بوبی صدر مملکت ءِ دابابت حوال تسر۔ داوخت آ صدر مملکت 150ملین ڈالر آن بناکروک آ چیلنج ٹیکسٹائل پارک انا ہم بناءِ کرے۔ صدر مملکت ڈاکٹر عارف علوی پارے کہ پاکستان ءِ چیلنج ٹیکسٹائل کون آ زرکاری نا پین گرج ءِ، پاکستان اسہ رکھ ءُ ملک اسے، ہراڑے درملکی زرکارآتے رکھ تننگک۔ اوپارے کہ پاک چین سنگتی آ نن گمر کینہ و چینی زرکاری آن ملک صنعتی انقلاب نا کنڈآ ہِننگ ءِ۔ صدر مملکت پارے کہ کورونا نا ساڑی آ دین آن مچ آ دنیا زہمی مس ولے پاکستان دادے بھلو حداسسکان توننگ اٹ سرسہب مس وخت اس کہ دانا برخلاف ویکسین تیار کروک آ ملک آتے ٹی اوار مسنے۔ مائیکرو فنانس و کوویڈ۔ 19ءِ کنٹرول کننگ اٹ سرسہبی حکومتی سرسہبی تا چرجوئی ءِ۔ اوپارے کہ اقتصادی وڑاٹ اسہ ملک اسے ہم تنیا کننگ مفک و دنیاءِ داوخت آ پاکستان نا گرج ءِ۔ ڈاکٹر عارف علوی پارے کہ نن چینی زرکارآتے سلاہ خلینہ کہ دانگیا بریر زرکاری کیر، و دنیا ءِ مثبت کلہوایتر۔ اوپارے کہ اقتصادی ویل آتا ایسری کن ترند تر رابطہ غاتا گرج ءِ انتئے کہ دنیا داوخت آ بھاز تیز مسنے۔ اوپارے کہ وزیراعظم نا کماشی ٹی ملک اٹی اسپیشل اکنامک زون جوڑ کننگ انگ ءِ، اکنامک زون تا لگنگ آن نئے بیرہ پوسکن آ انڈسٹری لگک بلکن مخلوق ءِ بھلو کچ اسے آ روزگار ہم ملک و انشاء اللہ بروک آدے پاکستان کن جوان مریک۔