اسلام آباد، نیویارک۔ 24ستمبر (اے پی پی) وزیرخارجہ مخدوم شاہ محمود قریشی نیویارک اٹی برجااقوام متحدہ نا جنرل اسمبلی نا 76می دیوان نا وخت آ فن لینڈ نا تینا ہم منصب پیکا ہاویسٹو تون اوڑدہی کرے۔ ہڑتوم آ وزیرخارجہ غاک ہڑتوم آ کنڈآتا سیاسی سلابت نا بروک آ دیوان ءِ زوت اڈتننگ آ امنا کریر۔ جمعہ نادے آ ترجمان دفترخارجہ نا رداٹ اوڑدہی ٹی ہڑتوم آ کنڈآتا تعلقداری و تین پہ تینی است خواہی نا علاقائی و جہانی باندات آ گپ وتران کننگا۔ وزیرخارجہ پارے کہ پاکستان فن لینڈ اتون تینا ہڑتوم آ کنڈآتا تعلقداری تے بھاز اہمیت ایتک۔ وزیرخارجہ مخدوم شاہ محمود قریشی پاکستان وفن لینڈ انا نیام اٹ سفارتی رابطہ غاتا ہفت دہائی پورو مننگ آ وزیرخارجہ ہاویسٹو ءِ مبارکبادی تس۔ و فن لینڈ اتون سیاسی تعلقداری تے پین سوگو کننگ، زرگزرانی بندھن ءِ گہر اکننگ و تعلیمی کمکاری ءِ سوگو کننگ نا عزم انا درشانی ءِ کرے۔ ہڑتوم آ وزیرخارجہ غاک ہڑتوم آ کنڈآتا سیاسی سلابت نا بروک آ دیوان ءِ زوت اڈتننگ آ امنا کریر۔ شاہ محمود قریشی پارے کہ اسلام آباد اٹی فن لینڈ انا سفارت خانہ دُوار ملنگ آن ننا واپاری تعلقداری مون آ کاہک و السی کہول آ رابطہ غاتے ٹی ودکی مریک۔ پاکستان و فن لینڈ انا نیام اٹ بڑزکو کہول آ رابطہ غاتا مون آ دننگ ہڑتوم آ کنڈآتا تعلقداری تے پین سوگو کننگ اٹ کمکار مریک۔ وزیرخارجہ فن لینڈ نا وزیرخارجہ ءِ دورہ پاکستان نا سلہ خلک و اودے اوغانستان نا مون آ بروک آ حالیت و ڈیہہ ٹی امن و سوگوی ءِ پک کننگ نا بابت پاکستان نا نقطہ نظرآن معلومدار کرے۔
