اسلام آباد، نیویارک۔ 24ستمبر (اے پی پی) وزیرخارجہ مخدوم شاہ محمود قریشی پارینے کہ اوغانستان اٹی پائیدار امن و سوگوی ڈیہہ کن بھاز اہمیت تخک۔ جمعہ نادے آ ترجمان دفترخارجہ نا رداٹ وزیرخارجہ نیویارک اٹی اقوام متحدہ نا جنرل اسمبلی نا 76می دیوان نا وخت آ جاپان نا تینا ہم منصب توشی مٹسو موتیجی تون اوڑدہی کرے۔ ہڑتوم آ وزیرخارجہ غاتا نیام اٹ ہڑتوم آ کنڈآتا تعلقداری، اوغانستان نا حالیت آتون اوار تین پہ تینی است خواہی نا ایلو باندات آتیا گپ وتران مس۔ وزیرخارجہ پارے کہ پارے کہ پاکستان جاپان تون تینا سیاسی و زرگزرانی تعلقداری تے بھاز اہمیت ایتک۔ پاکستان جاپان ءِ اسہ شونداری بابت پت انا قابل شریدار تکک، مخدوم شاہ محمود قریشی پارے کہ نن 2022ء ٹی پاکستان وجاپان نا سفارتی تعلقداری تا70می سال دے ءِ جم وجوش اٹ اڈتننگ نا ارادہ تخنہ، وزیرخارجہ پاک جاپان تین پہ تینی تعلقداری تے پین سوگو کننگ و تین پہ تینی است خواہی نا بشخ آتے ٹی کمکاری ءِ ودفنگ کن اسیجاکوشست آتے کاریم اٹ اتنگ نا گرج آ زور شاغا۔ وزیرخارجہ مخدوم شاہ محمو دقریشی تینا جاپانی ہم منصب ءِ اوغانستان نا مون آ بروک آ حالیت آتا بابت پاکستان نا نقطہ نظر آن معلومدار کرے وپارے کہ اوغانستان اٹی پائیدار امن و سوگوی ڈیہہ کن بھاز اہمیت تخک، اوغانستان اٹی انسانی وزرگزرانی تنکی نا چٹفنگ کن المی ءِ کہ جہانی برادری اوغان تا کمکاری ءِ پک کے۔ وزیرخارجہ مخدوم شاہ محمود قریشی بھارت نا کنڈآن مقبوضہ جموں و کشمیر اٹی برجاانسانی حق و جہانی کانود نا بھلا خلاف ورزی تا شاہدی تیا تالان اسہ ”ڈوزیئر“ اس جاپانی ہم منصب ءِ پیش کرے۔
