اسلام آباد۔ 24ستمبر (اے پی پی) بنجائی وزیر ڈٹ بندی، شونداری واصلاحات و خصوصی گام گیج اسدعمر پارینے کہ اقتصادی رابطہ کمیٹی کراچی سرکلر ریلوائی کن 20.7ارب روپئی نا خڑچ انا انفراسٹرکچر پروجیکٹ ءِ منظور کرینے۔ جمعہ نادے آ تینا ٹویٹ اٹی اوپارے کہ بروک آ ہفتہ وزیراعظم عمران خان دا پروجیکٹ نا بنائی دود انا مہمان خاص مریک۔ اوپارے کہ دا ڈٹ کراچی پیکج نا بشخ اسے۔ یات سلے کہ تدوک آ دے سینٹرل ڈویلپمنٹ ورکنگ پارٹی (سی ڈی ڈبلیو پی) 20.715بلین روپئی مالیتی کراچی سرکلر ریلویز نا لوپ سیکشن آن لیول کراسنگ نا چٹفنگ کن انفراسٹرکچر نا تفنگ نا ڈٹ ءِ منظوری کن ایکنک آ گدریفیسس۔ دیوان اٹی ٹرانسپورٹ اینڈ کمیونیکیشن نا بابت کراچی سرکلر ریلوائی نا لوپ سیکشن آن لیول کراسنگ نا چٹفنگ کن انفراسٹرکچر نا تفنگ (فلائی اوور/انڈرپاس اسٹرکچر) کن 20.715ارب روپئی نا خڑچ انا ڈٹ ءِ پیش کرے۔ سلاہ ئی تعمیراتی پنجر ڈرگ روڈ آن کراچی سٹی اسٹیشن اسکان کے سی آر لوپ اتون واقع 22لیول کراسنگ آتے چٹفنگ اٹ کمک کیک و داڑآن پبلک ٹرانسپورٹ نا اسہ پت انا قابل نظام اس دوبریک۔
