اسلام آباد۔ 24 ستمبر(اے پی پی) وزیراعظم نا خصوصی کمکار راجی رکھ و تخفیف نیزگاری ڈاکٹر ثانیہ نشتر پارینے کہ احساس پروگرام نا رداٹ الس ءِ ریلیف فراوان کننگ کن چندی پروگرام تا بناءِ کننگانے۔ وزیراعظم عمران خان شفافیت و گڈ گورننس آ یخین تخک۔ جمعہ نادے آ بڑزکو ایوان نا دیوان اٹی گپ وتران کرسااوپارے کہ ملک اٹی نیزگاری نا کچ انا تعین ءِ ادارہ شماریات کیک، ملک اٹی 2018-19اٹی نیزگاری نا کچ 21.9درسد ئس۔ اوپارے کہ احساس پروگرام نا دنگ اٹ بھازانگا پروگرامک بریرہ، 34ادارہ داپروگرام تیا عملدرآمد کیرہ، 115ضلع غاتے ٹی بے سود احساس وام پروگرام برجاءِ، پبلک پرائیویٹ پارٹنر شپ انا رداٹ احساس لنگرخانہ جوڑ کننگانے۔ اوپارے کہ ہنکین و کس اس لنگڑ خاچپ پروگرام بیت المال نا رداٹ بریرہ۔ احساس نشوونما پروگرام، احساس انڈر گریجویٹ پروگرام، احساس ایمرجنسی کیش پروگرام آ عمل برجاءِ۔ اوپارے کہ مستین نا حکومت آتا کرپشن نا سوب آن بی آئی ایس پی نا پروگرام بند کننگا، وسیلہ روزگار، وسیلہ حق و وسیلہ جان جوڑی پروگرام کرپشن نا سوب بند کننگار۔ اوپارے کہ الس نا آسراتی کن ون ونڈو آپریشن نابناءِ کننگ اُن، ستارہ مارکیٹ اٹی ون ونڈو آپریشن بناکرینے۔ اوپارے کہ احساس پروگرام شفافیت آ مبنی ءِ و داڑآ سیاست مفننگ ءِ انتئے کہ وزیراعظم عمران خان شفافیت و گڈ گورننس آ یخین تخک۔
