اسلام آباد۔ 24ستمبر (اے پی پی) سینیٹ اٹی قائد ایوان سینیٹر ڈاکٹر شہزاد وسیم پارینے کہ حکومت الیکٹرانک وونٹنگ مشین نا بابت اپوزیشن نا سلاہ تے بِننگ کن تیار ءِ، اوغانستان نا بابت علاقائی سوچ انا رداٹ اجتماعی فیصلہ کینہ، حکومت کشاری بشخ انا شونداری کن جامع گام گیج کرینے۔ جمعہ نادے آ بڑزکو ایوان نا دیوان اٹی سینیٹر شیری رحمان نا کنڈآن چست کروک ٹک آتا ورندی ءِ ترسا اوپارے کہ ٹیکنالوجی نا کاریم اٹ اتنگ آن شفافیت ءِ پک کننگ مریک، روس اٹی ساڑی آ گچین کاری تیٹی الیکٹرانک وونٹنگ مشین و انٹرنیٹ وونٹنگ ءِ کاریم اٹ اتنگا۔ داننا ایجنڈا نا ہم بشخ اسے۔ اوپارے کہ ای وی ایم نا مسخت وونٹ بٹنگ نا عمل ءِ آسان و شفاف کننگ ءِ، ای وی ایم نا بابت اپوزیشن نا سلاہ تے بِننگ کن تیار اُن، پیشن ناملک رہینگوک آ پاکستانی تے انٹرنیٹ وونٹنگ نا کمک اٹ وونٹ بٹنگ نا حق بایدے ملے۔ اوپارے کہ دنیا اوغانستان اٹ امن عمل و اوغانستان نا ساڑی آ حالیت آتے ٹی پاکستان نا کڑد ءِ امنا کرینے و وزیراعظم عمران خان نا کوشست آتا ستاءِ کرینے۔ اوغانستان نا بابت علاقائی سوچ انا رداٹ اجتماعی فیصلہ کینہ۔ اوپارے کہ اینخو سال خولم نا ہدف آن زیات ریکارڈ 27.3ملین ٹن پیدوار مس۔ ولے خولم نا خواست ودسا 29.5ملین ٹن مس۔ اوپارے کہ حکومت بزغرآتے آسراتی فراوان کننگ کن چندی گام گیج کرینے، بزغر کارڈ انا بناءِ کننگانے و بزغرآتے 1100ارب روپئی نا پیکج تننگانے۔
