بروک آ گچین کاریک الیکٹرانک وونٹنگ مشین نا کمک اٹ مریرہ، پیشن نا ملک رہینگوک آ پاکستانی تے وونٹ بٹنگ نا حق ملک، سینیٹر فیصل جاوید نا بڑزکو ایوان نا دیوان اٹی گپ وتران

اسلام آباد۔ 24ستمبر (اے پی پی) سینیٹ نا قائمہ کمیٹی حوالکاری وشینکاری نا چیئرمین سینیٹر فیصل جاوید اومیت ظاہر کرینے کہ بروک آ گچین کاریک الیکٹرانک وونٹنگ مشین نا کمک اٹ مریرہ، و پیشن نا ملک رہینگوک آ پاکستانی تے وونٹ بٹنگ نا حق ملک۔ جمعہ نادے آ بڑزکو ایوان نا دیوان اٹی گپ وتران کرسا اوپارے کہ سپریم کورٹ نا فیصلہ نا رداٹ کانودسازی پارلیمنٹ نا زمواری ءِ و شفاف گچین کاری کرفنگ الیکشن کمیشن، ای سی پی نا کاریم ءِ۔ اوپارے کہ ای سی پی نا 2019-23نا پلان نا رداٹ پائلٹ پروجیکٹ اٹی زیات آن زیات ٹیکنالوجی ءِ کاریم اٹ اتنگ آ زور شاغنگانے۔ اوپارے کہ گچین کاری تیٹی ای وی ایم نا کاریم اٹ اتنگ المی ءِ۔ 1970آن پد غٹ گچین کاری تیٹی دھاندلی نا غاو برساکرینے۔ اوپارے کہ حکومت الیکٹرانک وونٹنگ مشین نا بابت پارلیمانی کمیٹی اس جوڑ کرینے و اومیت ءِ کہ داٹی امنائی سلاہ ودی مریک، دا بابت کانود سازی ءِ پک کننگک۔