اسلام آباد۔ 24ستمبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ 30ستمبر اسکان ویکسین خلفپروک آتے سخت پابندی تتون مون تروئی تمک، ہڑدے ئی زند ءِ بحال کننگ کن ویکسی نیشن کرفنگ المی ءِ، اولیکو ڈوز ءِ خلفنگ نا 28دے آن پد بلاتاخیر ارٹ میکو ڈوز ءِ خلفر۔ تینا ویڈیو کلہو اسے ٹی اوپارے کہ کورونا نا مقابلہ ءِ کننگ مشکل ءِ ولے داسہ ننے دادین اتون مون تننگ نا وڑءِ ہیل کروئی ءِ۔ اوپارے کہ ویکسین خلفسا نن تینے وتینا خاہوت ءِ رکھ تخنگ کینہ۔ اوپارے کہ 30ستمبر آن پد ویکسین خلفپروک آتا برخلاف پابندی خلنگک۔ مچ آ ملک اٹی کورونا دین آن بچفنگ نا ویکسین مفت فراوان کننگ انگ ءِ۔ ہنداخاطرآن ہرہمو بندغ ہراداتم اسکان ویکسین خلفتنے او تینا ویکسی نیشن ءِ پورو کرفر۔ اوپارے کہ پڈپُر زالبول آتے کن ہم دا ویکسین بھاز رکھ ءِ۔ ضرورت داہیت انا ءِ کہ نن ہڑدے ئی زند انا کنڈآ پدی برین۔ داڑکن ویکسی نیشن نا عمل ءِ زوت آن زوت پورو کرفوئی مریک۔ کورونا دین آن بچفنگ نا ویکسی نیشن آن پد دا مننگ کیک۔ نم تون داپابندی تیان بچنگ کن دا المی ءِ کہ ویکسی نیشن نا سرٹیفکیٹ مرے۔ ہنداخاطرآن ای خواست کیوہ کہ ویکسین خلفسا تینے رکھ کبو و اُراوالاتے ہم رکھ کبو۔
