وزیرخارجہ مخدوم شاہ محمود قریشی نا امریکی سینیٹ نا خارجہ تعلقداری کمیٹی نا رینکنگ ممبر جیمزرِش تون ٹیل فون آ رابطہ، امریکہ تون اقتصادی و واپاری کمکاری ءِ ودفنگ، اوغانستان نا حالیت آتیا گپ وتران کریر

اسلام آباد، نیویارک۔ 24ستمبر (اے پی پی) وزیرخارجہ مخدوم شاہ محمود قریشی نیویارک اٹی اقوام متحدہ نا جنرل اسمبلی نا دیوان نا وخت آ امریکی سینیٹ نا خارجہ تعلقداری کمیٹی نا رینکنگ ممبر ریپبلکن سینیٹر جیمز رِش تون ٹیل فون آ رابطہ کرے۔ جمعہ نادے آ ترجمان دفترخارجہ نا رداٹ وزیرخارجہ پاکستان نا کنڈآن امریکہ تون وسیع بنداو، سٹریٹجک شریداری نا است خواہی نا درشانی ءِ کرے ہراہڑتوم آ کنڈو علاقائی بابت ہڑتوم آ ملک آتا اسیجافائدہ غاتے مون آ دننگ اٹ کمکار مریک۔ وزیرخارجہ علاقائی رابطہ، ہڑتوم آ کنڈآتا واپار و اقتصادی کمکاری ءِ ودفنگ نا اہمیت آ زور شاغا۔ وزیرخارجہ اوغانستان اٹی اسہ جامع سیاسی ایسر اسے نا دوئی کننگ کن کوشست آتے برجاتخنگ نا عزم انا درشانی ءِ کرے وپارے کہ اوغانستان اٹی اسہ سوگو و وسیع بنداو حکومت اسے نا گرج ءِ تانکہ جہانی دہشت گرد رڑ، اوغان گل زمین نا دُوارہ اسل استحصال ءِ کننگ کپس۔ امریکی سینیٹر رش ہڑتوم آ کنڈو علاقائی باندات آ اسیجائی مسخت آتا دوئی کننگ کن ہڑتوم آ ملک آتا نیام اٹ کمکاری ءِ برجاتخنگ نا بابت وزیرخارجہ مخدوم شاہ محمود قریشی نا نقطہ نظرآن امنا کرے۔