ڈیرہ اسماعیل خان۔ 23ستمبر (اے پی پی) وزیراعظم عمران خان پارینے کہ بھلا بھلا مافیاک ملک اٹ کانود نا بالادستی ءِ خواپسہ، مستین نا حکمرانک نظام ءِ سوگو مننگ کن الیتوس، کرپٹ سسٹم آن فائدہ ہرفوک آک پارہ کہ ننے این آر او اِیت و نیزگار آتے ہل، ملک و الس نا شونداری کن بروک آ گچین کاری تا آخا بروک آ چین تا سجفوئی مریک، ودوک آ آبادی نا گرج آتے پورو کننگ کن کشاری پیدوار اٹ ودکی کروئی مریک، دیر کوڑی کننگ، دیر انا گچین کاریم اٹ اتنگ، بنجر ڈغار تے دسنگ نا قابل کننگ و کشاری پٹ وپول آ چکار کروئی مریک، ہندن ءُ ڈٹ بندی کننگ اُن کہ جہانی منڈی نا اثرآک ننا ملک اٹی گڑاتا نہاد آتیا تمپ، وزیرستان اٹی محسود و وزیر قبیلہ کن اِراضلع جوڑ کینہ۔ اوداخیال آتا درشانی ءِ پنچ شنبے نادے آ داڑے بزغرکنونشن و بزغرکارڈ بشخنگ نا دود آن تران کرساکرے۔ دود اٹی گورنر خیبرپختونخوا شاہ فرمان، وزیراعلیٰ خیبرپختونخوامحمود خان، بنجائی وزیر امور کشمیر و گلگت بلتستان علی امین گنڈاپور، وزیراعظم نا خصوصی کمکار غذائی پٹ وپول جمشید اقبال چیمہ ئسک ہم ساڑی ئسر۔ وزیراعظم پارے کہ مدینہ نا ریاست نا قیام دنیا نا اسہ بھاز بھلو انقلاب اس ئس و اسلام نا پن ءِ جند انا فائدہ کن کاریم اٹ اتنگ نا او قائل اف، خواجہ ﷺ نا حیات مبارک نا مطالعہ ءِ کرینٹ، منہ سال اٹی مدینہ نا ریاست دنیا نا حالیت آتے بدل کرے، اینو دین آ عمل کپننگ نا سوب آن ننا حالیت ابتر ءِ، مدینہ نا ریاست اٹ عدل و انصاف نا نظام قائم کننگاسس، پاکستان اٹی بھلا بھلا مافیاک کانود نا بالادستی ءِ خواپسہ، ہرافک کرپٹ نظام آن فائدہ ہرفسا کرینو او پارہ کہ ننے این آر او اِیت، و نیزگار آتے ہل، مستین نا حکمرانک نظام ءِ سوگو مننگ کن الیتوس، سُچا و غیرت مند مخلوق سوگو ءُ قوم اس جوڑ کننگ کیک، ننے بھلو قوم اس مننگ کن صادق و امین جوڑ مروئی مریک و انصاف نا نظام ءِ قائم کروئی مریک و عظیم قوم اس جوڑ مننگ کن تینا اخلاق ءِ بڑز کروئی مریک۔ وزیراعظم پارے کہ ورناک پاکستان نا آبادی نا اکثریتی بشخ اسے ءُ، پاکستان اٹی ہچ ءُ گڑاسے نا کمتی اف، دنیا ٹی کس اسے نا مون آ دُوتوروک آنا آخا غیرت مند بندغ آتا عزت مریک، رشوت تننگ و رشوت ہلوک ہڑتوم آتا غیرت چٹک، رشوت ءِ چٹفوئی مریک۔ اوپارے کہ پیشن نا دنیا ٹی اسٹ اس ہم دھاندلی نا سجفنگ ہم کپک ولے ننا ملک اٹی پولنگ ایجنٹ آک ہم ساڑی مریرہ ولے اوکان پد ہم ننا چکار ووٹرآتے پولنگ اسٹیشن آ اتنگ آن زیات دھاندلی ءِ توننگ آ مریک، پیشن نا ملک ارب آ روپئی نا جائیداد جوڑ کروک آک داسہ ہموڑے تولوک ءُ، و تقریر کننگ ءُ ولے تینا کٹیا نا ذریعہ نا اسہ رسید اسکان نشان تننگ کپسہ، نن مافیاتا برخلاف کانود نا بالادستی نا جنگ کننگ اُن ولے اوڑتون اوار اوار قوم ءِ ہم تینے بدل کروئی مریک، پاکستان نا جوڑ مننگ نا وخت آ ننا آبادی 4کروڑ آن ہم کم ئس، اینو آبادی 22کروڑ آن زیات ءِ، کشاری ملک مننگ آن پد ہم تدوک آ سال 40لکھ ٹن خولم درآمد کننگا، اینخو نا سال خولم نا ریکارڈ پیدوار مننگ آن پد ہم ننے خولم درآمد کروئی تمنگ ءِ، ہنداوڑ دال، سی وایلو کنوئی آ گڑاتے ہم درآمد کینہ، پیشن نا منڈی تیٹی نہاد آتا ودنگ آن داڑے ہم کبینی ٹی ودکی مس۔ وزیراعظم پارے کہ بنداوی تعلیم و بنداوی جان جوڑی آ خاص چکار کننگ انگ ءِ، ہنداڑآن ودوک آ آبادی نا مون ءِ توننگ مریک، ننے تینا ودوک آ آبادی نا گرج آتے پورو کننگ کن فصل آتا پیدوار اٹی ہم ودکی کروئی مریک اگہ آبادی ہنداوڑ ودسا کرے تو ولدا مون آ بین و افلاس تون مون تننگ مریک۔ وزیراعظم پارے کہ بنجائی حکومت قبائلی علاقہ غاتا شونداری و الس نا شونہالی کن کوشست کننگ ءِ، وزیرستان اٹی محسود و وزیر قبیلہ غاتے کن اِراضلع جوڑ کننگک، ہڑتوم آ قبیلہ غاتا نیام اٹ ڈغار تا بابت ویل ارے، ڈغارتا جھیڑہ غاتا ایسر کننگ کن وزیراعلیٰ خیبرپختونخوا محمود خان ءِ پارت کرینن، پوسکن آ ضلع غاتا جوڑ کننگ آن انتظامی امور اٹی گچینی بریک و مخلوق ءِ گچین آسراتی ملک۔
