اسلام آباد۔ 23ستمبر (اے پی پی) وزیراعظم عمران خان (اینو) پنچ شنبے نادے آ ڈیرہ اسماعیل خان نا دورہ ءِ کیک ہراڑے او بزغرکارڈ بشخک۔ وزیراعظم گومل زام ڈیم انا کمانڈ ایریا و پی اے آرسی ایرڈریسرچ اسٹیشن آتا ہم بناءِ کیک۔ پنچ شنبے نادے آ وزیراعظم آفس نا میڈیا ونگ انا کنڈآن جاری بیان نارداٹ وزیراعظم عمران خان (اینو) خیبرپختونخوا نا بزغرآتے ٹی بزغرکارڈ بشخک، اولیکو ریسہ ٹی صوبہ نا 5لکھ رجسٹرڈ بزغرآتیان 2لکھ بزغرآتے ٹی بزغرکارڈ بشخنگ انگ ءِ۔ بزغرکارڈ مچ آ ملک انا غٹ اے ٹی ایم مشین تیا کاریم اٹ اتنگ مریک۔ اولیکو ریسہ ٹی بزغرآتا ڈیٹابیس ءِ گچین کننگک و اوفتے سبسڈی (مشینری، ان پٹ پین پین) فراوان کننگک، وخت اس کہ ارٹ میکو ریسہ ٹی بزغرآتے بے سود/کم مارک اپ آ وام فراوان کننگک و فصل آتا انشورنس ءِ کننگک۔ داکان بیدس اوفتے قدرتی آفت آتا حالیت اٹ مالی امداد ہم فراوان کننگک۔ داکان بیدس صوبہ ٹی کشت وکشار نا مون آ دننگ کن مالی سال 2021-22اٹی بزغرآتے 1048.38ملین روپئی نا سبسڈی تننگک۔ داکان بیدس وزیراعظم گومل ایگری یونیورسٹی نا ماڑی نا بناءِ کیک۔ وزیراعظم گومل زام ڈیم انا کمانڈ ایریاو پی اے آرسی ایرڈ ریسرچ اسٹیشن آتاہم بناءِ کیک۔
