اسلام آباد۔ 23ستمبر (اے پی پی) وزیراعظم عمران خان بے مٹ ہنکین تا جوڑ کننگ ءِ زوت عمل اٹ اتنگ نا پارت کرسا پارینے کہ ہنکین تا مسخت نیزگار تپہ نا الس نا شرف ءِ مجروح مننگ آن بچفنگءِ۔ داخیال آتا درشانی ءِ او خصوصی کمکار تخفیف نیزگاری و راجی رکھ ڈاکٹر ثانیہ نشتر تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ داوخت آ ایم ڈی بیت المال، چیئرمین سی ڈی اے و تعلقدار آفیسر آک ہم ساڑی ئسر۔ وزیراعظم آفس نا میڈیا ونگ انا کنڈآن جاری بیان نا رداٹ اوڑدہی ٹی وزیراعظم ءِ ہنکین تا حالیت وگچینی کن جوڑ کروک آ ڈٹ آتیا حوال تننگا۔ وزیراعظم ءِ پاننگاکہ ڈٹ آ مسہ ریسہ غاتے ٹی عملدرآمد کننگک، ڈٹ انا رداٹ ساڑی آ پناہ گاہ تے ٹی آسراتی تا فراوانی ٹی گچینی اتنگک، نجی جہانی ہوٹل آن ہنکین تاعملہ ءِ تربیت فراوان کننگک، پالیسی آ عملدرآمد کن اسہ مرکزی ءُ بورڈ و انتظامی باندات آتے ہُننگ کن ہر ہنکین اٹ 4باسکی بورڈ اس ٹہیفنگک۔ آسراتی تا بابت ڈیجیٹل ڈیش بورڈ اس جوڑ کننگک ہراچاروکی ٹی کمک کیک، ڈیش بورڈ ءِ موبائل نا کمک اٹ آسانی اٹ چلیفنگک و ساڑی آ ہنکین تیٹی ویل آتا پیدواری ءِ کرسا اوفتے ایسر کننگک۔ وزیراعظم ءِ پاننگاکہ ہنکین تے دامسخت کن تفنگا ماڑی تیٹی منتقل کننگ ہم ڈٹ انا بشخ اسے، ہنکین آتون احساس ون ونڈو سینٹر ہم ملنگک، ون ونڈو سینٹر نا کمک اٹ ہنکین تے ٹی رہینگوک آ اہل بندغ آتے احساس نا رداٹ ایلو پروگرام تیان آسراتی ہلنگ اٹ آسانی مریک۔ وزیراعظم پارت کرے کہ ہرا ہنکین تیا مخلوق نا رش ءِ اوفتیا خاص چکار کننگے۔ اوپارے کہ ہنکین تا سیاست تون ہچ ءُ تعلق اس اف، اونا تعلق اللہ و اونا مخلوق نا خذمت تون ءِ، ہنکین تا مسخت زرگزرانی وڑاٹ نیزگار تپہ نا مخلوق نا شرف ءِ مجروح مننگ آن بچفنگ ءِ، ہنکین تیان مست نیزگار مزور روڈ آتیا خاچنگ آ بیوس ئسر۔ وزیراعظم پارت کرے کہ ڈٹ انا رداٹ بے مٹ ہنکین تا جوڑ کننگ آ زوت عمل کننگے۔
