اسلام آباد۔ 23ستمبر (اے پی پی) وزیرخارجہ مخدوم شاہ محمو د قریشی اقوام متحدہ نا جنرل اسمبلی نا 76می دیوان نا وخت آ سلووینیا نا وزیر خارجہ اینزے لوگارتون اوڑدہی کرے۔ وزیرخارجہ غاک ہڑتوم آ ملک آتا نیام اٹ بڑزکو کہولی ہن وبر نا کمک اٹ تین پہ تینی رابطہ غاتے ودفنگ آ امنا کریر۔ ترجمان دفترخارجہ نا رداٹ ہڑتوم آ وزیرخارجہ غاتا نیام اٹ ہڑتوم آ کنڈآتا تعلقداری و اوغانستان نا ساڑی آ حالیت آتیا گپ وتران مس۔ شاہ محمود قریشی پارے کہ سلووینیا، یورپی یونین نا اہم ءُ ملک اسے، پاکستان، سلووینیا تون ہڑتوم آ کنڈآتا تعلقداری تے خاص اہمیت ایتک۔ وزیرخارجہ یورپی یونین نا صدارت نا منصب ءِ سنبھالنگ آ سلووینیا نا وزیر خارجہ ءِ مبارکبادی تس وپارے کہ اسہ پرامن و سوگو اوغانستان، پاکستان و ڈیہہ کن بھاز اہمیت تخک۔ وزیرخارجہ اومیت ظاہرکرے کہ اوغانستان اٹی جوڑ مروک آ پوسکن آ حکومت اجتماعیت نا حامل مریک۔ پاکستان، اسیجائی زمواری نا رداٹ اوغانستان اٹی امن کن تینا کڑد ءِ ادا کرسا کیک، اوغانستان اٹی امن نا فائدہ مچ آ ڈیہہ ءِ اسہ وڑاٹ مریک۔ شاہ محمود قریشی پارے کہ حالیت آک بگاڑ نا گواچی مسر تو غٹ زہمی مرینہ، پاکستان، اوغانستان اٹی اجتماعیت نا حامل سیاسی ایسر نا مخ تف ءِ۔ اوپارے کہ اوغانستان اٹی ممکنہ انسانی و اقتصادی تنکی نا رداٹ، جہانی برادری ءِ، اوغان تا کمک کن گچین گام گیج کروئی مریک۔ وزیرخارجہ تینا ہم منصب ءِ، ایلو یورپی ملک آتا وزیر خارجہ غاتون مروک آ رابطہ غاتیان معلومدار کرے۔ وزیرخارجہ مخدوم شاہ محمود قریشی اوغانستان نا خڑک انا ہمسایہ ملک آتا وزیر خارجہ و ایس سی او سمٹ نا وخت آ ایس سی او و سی ایس ٹی او نا ڈل آتا سروک آتون مروک آ گپ وتران آن سلووینیا وزیرخارجہ ءِ معلومدار کرے وپارے کہ پاکستان 37ملک آتا باتی و جہانی ادارہ غاتیان تعلق تخوک آ 14ہزار آن زیات بندغ آتے کابل آن رکھ کشنگ اٹ پبی کمک فراوان کرے۔ وزیرخارجہ لوگر جہانی پیش تمنگ نا کوشست آتے آسان کننگ اٹ پاکستان نا مثبت کڑد انا ستاءِ کرے۔ ہڑتوم آ وزیرخارجہ غاک پاکستان و سلووینیا نا نیام اٹ بڑزکو کہولی ہن و برتا کمک اٹ تین پہ تینی رابطہ و علاقائی ویل آتیا سلابت نا چرجوئی ءِ برجاتخنگ و ہڑتوم آ کنڈآتا کمکاری ءِ مون آ دننگ آ امنا کریر۔
