اسلام آباد۔ 23ستمبر (اے پی پی) بنجائی وزیر تعلیم و کسبی تربیت شفقت محمود تون وزیراعظم نا خصوصی کمکار سی ڈی اے علی نواز اعوان، باسک آف نیشنل اسمبلی، راجہ خرم نواز ئسک اوڑدہی کریر۔ اوڑدہی ٹی اسلام آباد نا رول ایریہ غاتے کن اسہ پولی ٹیکنک انسٹیٹیوٹ اس ملنگ کن چندی سلاہ تا جاچ ءِ ہلنگا ہراٹی خاص وڑاٹ طالب علم آتے کسب نا تعلیم آن شپ کننگ مرے۔ ڈی جی فیڈرل ڈائریکٹوریٹ آف ایجوکیشن بشخ ہلوک آتے اسلام آباد میرابگوال کالج آ ہم حوال تس۔ بنجائی وزیر تعلیم شفقت محمود پارت جاری کرے کہ غلام اسحاق خان انسٹیٹیوٹ آف انجینئرنگ، سائنس و ٹیکنالوجی ہراکہ اسلام آباد اٹی تینا کیمپس ءِ ملنگ کن است خواہی تخک، تون داچرجوئی ٹی گپ وتران کننگے کہ سائنس و انجینئرنگ نا تعلیم تون اوار اوار او پولی ٹیکنک نا بشخ اس ہم قائم کے و اسہ ہفتہ ٹی چندی آپشن تیا سلاہ تے حتمی دروشم اس ترسا پیش کننگے۔ بنجائی وزیرتعلیم قومی اسمبلی نا باسک آتے معلومدار کرے کہ کسب نا تعلیم ءِ اسکول آتے ٹی درستی راستی کرفنگ کن بنجائی وزارت تعلیم عملی گام گیج کننگ ءِ دا چرجوئی ٹی اسلام آباد نا 30اسکول آتے ٹی میٹرک ٹیک پروجیکٹ ءِ درستی راستی کرفنگ انگ ءِ۔ طالب علم آتے کسب نا تعلیم آن شپ کننگ کن نیوٹیک کسبکار استاد تننگ ءِ۔ داچرجوئی ٹی اسکول آتے ٹی خاص ورکشاپ اس جوڑ کننگ انگ ءِ۔ بنجائی وزیر تعلیم پارے کہ ساڑی حکومت عمومی تعلیم تون کسب نا تعلیم آ خاص چکار کننگ ءِ تانکہ طالب علم آتے عمومی تعلیم تون کسب نا تعلیم ترسا باعزت روزگار نا دوئی کننگ نا زیات آن زیات وارخواہی تننگ کے۔
