اسلام آباد۔ 23ستمبر (اے پی پی) چیئرمین سینیٹ محمد صادق سنجرانی سعودی عرب نا سرکڑدہ غاتے سعودی عرب نا قومی دے انا وخت آ مبارکبادی تسنے۔ سینیٹ سیکرٹریٹ نا رداٹ چیئرمین سینیٹ تینا کلہو اٹی پارے کہ پاکستان نا الس پارلیمان و حکومت سعودی عرب نا الس نا خوشی تیٹی شریک ءُ، قومی دے ہر ملک اکن بھاز اہمیت تخک، پاکستان و سعودی عرب نا ہڑتوم آ کنڈآتا تعلقداری تاریخی و بے مٹ ءُ۔ پاکستان و سعودی عرب نا الس نا است اسہ ایلو تون دھڑکک۔ چیئرمین سینیٹ پارے کہ اسیجائی مذہبی، دودوربیدگی وراجی مماثلت پاکستان و سعودی عرب ءِ اسہ ایلو نا خڑک تخانو۔ پاکستان و سعودی عرب شونداری و شونہالی نا اسیجائی ویژن تخرہ و ہڑتوم آ کنڈآتا کمکاریءِ پوسکن آ بڑزی تسکان دننگ نا خواہندار ءُ۔ چیئرمین سینیٹ محمد صادق سنجرانی پارے کہ سعودی عرب نا شونداری و شونہالی و سوگوی کن دعا کینہ۔ بڑزکو کہول آ ڈل آتا ہن و برآن پاکستان و سعودی عرب نا نیام اٹ ہڑتوم آ کنڈآتا کمکاری نا اسہ پوسکن ءُ دور اس بناکرینے۔ چیئرمین سینیٹ سعودی عرب نا بادشاہ و ولی عہد کن نیک است خواہی نا درشانی ءِ کرے و پارے کہ پاکستان نا الس سعودی عرب نا ایلم تا خوشی تیٹی شریک ءِ۔ پاکستان و سعودی عرب نا تعلقداری وخت اتون اوار اوار سوگو آن سوگو مننگ ءُ۔ چیئرمین سینیٹ پارے کہ مذہبی و دودوربیدگی مماثلت آن بیدس امن وشونہالی کن اسیجائی بصیرت ہڑتوم آ کنڈآتا تعلقداری تے سوگو کیک۔
