اسلام آباد۔22ستمبر (اے پی پی): وزیر ءِ مملکت اھوالکاری ءُ شنگ کاری فرخ حبیب ءَ گوشت کہ استیں حکومت ءِ توامیں پالیشی آنی مول ءُ مراد نیاد آنی تہ ءَ گیشی ءِ بار ءَ را کم چہ کم آسر آنی الس ءِ رسگ انت، توامیں گامگیج آنی مول ءُ مراد اسل ءَ چہ گیشاں چہ گیش ریلیف پجاری کنگ انت۔ آ چار شمبے ءِ روچ ءَ بنجاھی وزیر ھزانگ شوکت ترین، ھاسیں کمکار جمشید اقبال چیمہ ءِ ھمبراھی ءَ پریس کانفرنس ءَ گوں گشتانک دیان ءَ کت۔ وزیر ءِ اھوالکاری ء ُ شنگ کاری فرخ حبیب ءَ گوشت کہ مزن وزیر عمران خان ءَ وردنی سامان آنی نیاد آناں کمک کنگ ءِ پنت ءُ شون کتگ۔ آئی ءَ گوشت کہ نیشنل پرائس مانیٹرنگ کمیٹی ءِ ھمک ھپتگ دیوان چار شمبے ءَ بنجاھی وزیر ھزانگ شوکت ترین ءِ سروکی ءَ برجم بیت، دیوان ءَ سرجمیں ملک ءِ اندر ءَ 22 کروڑ الس ءِ ھمک روچ ءِ دست کٹ ءِ بنیات ءَ کارمرز بوھوکیں سامان آنی قیمت آنی گوما دیم پہ دیمی ءُ چار ءُ تپاس کنگ بوت۔ قیمت آناں چتور الس ءِ واستہ آسان کنگ بہ بنت تاں الس گران بائی ءَ چہ بہ رکھ انت، اے ھوالگ ءَ یک پلیٹ فارم ءِ جوڑ کنگ ءِ پیسلہ کنگ بوت۔ آئی ءَ گوشت کہ میاں اوستمانی تک ءَ کوویڈ ءِ ساھت ءَ جاور ھمروچگیں رنگ ءَ نہ انت، سرجمیں دگنیا ءَ سامان آنی قیمت آنی تہ ءَ گیشی انت، سامان آنی پجاری ءِ واستہ شپمنٹ آنی تہ ءَ بے کساس گیشی بوتگ۔
