اسلام آباد۔ 22ستمبر (اے پی پی) وزیراعظم عمران خان پارینے کہ نن بدلی نا مخالف مافیا تا مون آ سلوک اُن، کرپٹ سسٹم آن فائدہ ہرفوک آک الیکٹرانک وونٹنگ مشین (ای و ایم) نا مخالفتءِ کننگ ءُ، ای وی ایم پاکستان نا ویل آتے ایسر کیک، بروک آ اِراسال حکومت کن بھاز اہم ءُ، ننے تینا ہدف آتے دوئی کروئی ءِ، غٹ وزارت آک خواری کیر۔ داخیال آتا درشانی ءِ او چارشنبے نادے آ داڑے کارکڑد معاہدہ غاتیا دستخط نا دود آن تران کرساکرے۔ داوخت آ بنجائی وزیر حوالکاری و شینکاری چوہدری فواد حسین، بنجائی وزیر سائنس اینڈ ٹیکنالوجی سینیٹر شبلی فراز، وزیراعظم نا خصوصی کمکار اسٹیبلشمنٹ ارباب شہزاد تون اوار بنجائی وزیر آک، خصوصی کمکارو سلاہکارآک، بنجائی محکمہ غاتا سیکرٹریک و بڑزکو کمامدارآک ساڑی ئسر۔ دود آن تران کرسا وزیراعظم پارے کہ بروک آ 2سال اکن تینا ہدف آتے مقرر کننگ المی ئسک۔ دانا مانیٹرنگ ءِ ہم کننگک۔ بروک آ سال ننکن بھاز اہمیت تخک۔ اگہ نن داٹی تینا ہدف آتے دوئی کرین تو حکومت نا آخیریکو سال اٹی رہینگوک آ ہدف آتے دوئی کننگ ہم آسان مریک۔ وزیراعظم پارے کہ اودے ٹیم ءِ چلیفنگ نا آزموندہ ارے و اودادے کرکٹ آن ہیل کرینے۔ ہرجاگہ غا ٹیم ءِ چلیفنگ نا اصول اسہ وڑ مریک۔ ای 10سال کرکٹ ٹیم انا کیپٹن رہینگاٹ و گوازی گرآتے بننگ و ہِننگ آخناٹ۔ مدام ہمو ٹیم سرسہب مریک ہرامچ آ وخت تینا جاچ ءِ ہلسا کیک۔ وتینا کارکڑد آ نظر شاغک۔ وزیراعظم پارے کہ تعلیم ہم ننے تینا لائخی تا جاچ ءِ ہلنگ ہیل ایتک۔ وزیراعظم وزارت آتیا زور شاغا کہ او تینکن ہراہدف آتے مقرر کرینو اوفتے دوئی کیر۔ وزیراعظم پارے کہ مشکل اٹ ہارمنوک آ وخت اس ہم مون آ ہِننگ کپک۔ اوپارے کہ ہراتم ای شوکت خانم ہسپتال نا بناءِ کننگ کن لاہور نا پنی آ ڈاکٹر آتے بٹنگاٹ تو 20آن 19ڈاکٹر آک پاریر کہ کینسر ہسپتال جوڑ مننگ کپک، بیرہ اسٹ اس پارے کہ جوڑ مننگ کیک ولے غریب آتا مفت درمان مننگ کپک۔ وزیراعظم پارے کہ امریکی سی ای او پارے کہ 5درسد آن زیات ناجوڑآتا مفت درمان کننگ نا کوشست کرے تو ہسپتال مسہ تُو اٹی بند مریک۔ مسہ تُو آن پد سی ای او پدی ہنا ولے ہسپتال اینو اسکان چلینگ انگ ءِ۔ ہرسال 9ارب روپئی کینسر نا ناجوڑآتا مفت درمان آ خڑچ مریک۔ وزیراعظم پارے کہ ہراتم نن تینا وژن اس سیٹ کینہ تو اوڑآ سمجھوتہ کننگپ۔ مشکل وخت اٹی انسان نا لائخی تا امتحان مریک و صبر کروک آ سرسہب مریک۔ اوپارے کہ حکومت نا اولیکو سال بھاز مشکل آتون مون تروئی تما، دامشکل ءُ وخت اس ئس۔ وزیراعظم پارے کہ نن ہموغٹ مافیا تا مون آ سلوک اُن ہرا بدلی خواپسہ، اوالیکٹرانک وونٹنگ مشین نا مخالفت ءِ کننگ ءُ۔ مستین اٹ ہرالیکشن اٹ دھاندلی نا دوبہ لگا ومتنازعہ مسر۔ الیکٹرانک وونٹنگ مشین اٹ دھاندلی نا دوبہ غاک چٹرہ۔ کرپٹ مخلوق ہراداسسٹم آن فائدہ ہرفسا کریر او ملک اٹ بدلی خواپسہ۔ داحکومت نا غٹ آن بھلا دشمنک ءُ۔ الیکٹرانک وونٹنگ مشین آن ویل آک ایسر مریرہ۔ آخیریکو اِراسال ننکن بھاز اہم ءُ۔ نن اقتصادی مشکل آتا مون ءِ تورین وکورونا دین انا حالیت آتے ٹی مشکل فیصلہ کرین۔ تینا مخلوق ءِ بچفین و زرگزران ءِ ہم۔ نن مشکل وخت آن پیش تمرسا داڑے سرمسونن۔ داسال خواری کینہ تو تینا ہدف آتے دوئی کینہ۔ وزیراعظم پارے کہ اسمبلی نا باسک آک شونداری فنڈ خوارہ۔ نن شونداری فنڈ آن آخا، حکومت نا کارکڑدنا بنداو آ بروک آ گچین کاری تے کٹنہ۔ وزیراعظم پارے کہ اصل جنگ پنجاب اٹی ءِ۔وزیراعظم خصوصی کمکار ارباب شہزاد ءِ کارکڑد نا جاچ ءِ ہلنگ نا نظام آ مبارکبادی تس۔
