اسلام آباد۔ 22ستمبر (اے پی پی) وزیرخارجہ مخدوم شاہ محمود قریشی تون اونا مصری ہم منصب سامح شکری نیویارک اٹی برجا اقوام متحدہ جنرل اسمبلی نا ہفتاد ءُ شش می دیوان نا وخت آ اوڑدہی کرینے۔ ترجمان دفترخارجہ نا رداٹ دااوڑدہی ٹی ہڑتوم آ کنڈآتا تعلقداری و تین پہ تینی است خواہی نا باندات آتیا گپ وتران مس۔ وزیرخارجہ مخدوم شاہ محمو دقریشی پارے کہ پاکستان، مصر اتون تینا ہڑتوم آ کنڈآتا تعلقداری تے خاص اہمیت ایتک۔ پاکستان ومصر انا نیام اٹ اسہ وڑ مذہبی، دودوربیدگی و تہذیبی قدر، داتعلقداری تے پین سوگو کننگ کن سوگو بنداو اس فراوان کیک۔ اوپارے کہ پاکستان و مصر انا نیام اٹ، پارلیمانی، اقتصادی، دفاعی، تہذیبی و علمی بشخ آتے ٹی ہڑتوم آ کنڈآتا کمکاری ءِ ودفنگ نا بھلو وارخواہی اس ساڑی ءِ، ننا پارلیمنٹ اٹ، پاک۔مصر فرینڈ شپ پڑک ہڑتوم آ ملک آتا نیام اٹ پارلیمانی رابطہ غاتا مون آ دننگ کن متحرک ءِ۔
