اسلام آباد۔ 22ستمبر (اے پی پی) وزیراعظم نا نمائندہ خصوصی بین المذاہب ہم آہنگی و دے ٹک نیامی امور و پاکستان علماکونسل نا چیئرمین حافظ محمد طاہر محمود اشرفی پارینے کہ سعودی عرب نا وزیرخارجہ امیر فیصل بن فرحان نا کنڈآن کشمیر نا ویل اتون اوار پاکستان ہندوستان نا نیام اٹ مذاکرات و ثالثی نا کڑد ءِ ادا کننگ نا پڑو نا ستاءِ کینہ، پاکستان مدام مذاکرات نا ہیت ءِ کرینے ولے ہندوستان ڈیہہ ٹی جارحیت، دہشت گردی و انتہاپسندی ءِ مون آ درینے۔ داہیت ءِ او چارشنبے نادے آ میڈیا تون گپ وتران کرساپارے۔ اوپارے کہ کشمیر نا ویل آ سعودی عرب نا وزیرخارجہ امیر فیصل بن فرحان ہندوستان نا دورہ ٹی سعودی عرب نا موقف ءِ پیدوار وڑاٹ بیان کرینے ہرانا نن ستاءِ کینہ، پاکستان مدام ہندوستان تون مذاکرات نا ہیت ءِ کرینے و پاکستان نا موقف پیدوار ءِ کہ مذاکرات کشمیر آن بیدس مننگ کپک، سعودی عرب اگہ کشمیرنا ویل انا ایسری کن پاک بھارت مذاکرت کن کوشست کیک تو پاکستان اونا ستاءِ کرینے وکیک۔ سعودی عرب ءِ جہانی دنیا و عالم اسلام اٹ اہم ءُ ہند اس دوئی ءِ و پاکستان سعودی عرب نا تعلقداری تیٹی اسہ واک اس ہم بننگ کپک۔ اوپارے کہ 23ستمبر آ پاک سعودی عرب تعلقداری مستین، ساڑی، آخبت آ اسہ اہم ءُ سیمینار اس اسلام آباد اٹی مریک۔
