اسلام آباد، نیویارک۔ 22ستمبر (اے پی پی) وزیرخارجہ مخدوم شاہ محمود قریشی پارینے کہ اوغان تا منجمد میرات آتے ملنگ آن اوغانستان ءِ انسانی تنکی آن کشنگ اٹ کمک رسینگک، زموارانہ طرزعمل طالبان تا تینا فائدہ ٹی ءِ، ہندوستان پاکستان اٹ نزوری خواہک، اوننا برخلاف اوغان گل زمین ءِ کاریم اٹ ایس۔ دفترخارجہ نا رداٹ وزیرخارجہ چارشنبے نادے آ نیویارک اٹی برجا اقوام متحدہ جنرل اسمبلی نا 76می دیوان نا وخت آ فارن پریس ایسوسی ایشن تون ورچوئل اوڑدہی کریکہ۔ اوپارے کہ اوغانستان نا حالیت بدل مننگ ءِ، جہانی برادری نا طالبان آتون گڑاس اومیت ارے وخت اس کہ گڑاس حلقہ غاتا خیال ءِ کہ طالبان تا ساڑی آ قیادت اجتماعیت نا حامل اف، ولے کنا حوال انا رداٹ داسہ اوغانستان اٹی طالبان سرکڑدہ، وسعت پذیر مننگ ءُ داٹی اوغانستان نا ایلو قوم تے ہم اوار کننگ انگ ءِ۔ اوپارے کہ امریکی سرکڑدہ غاتا رداٹ اوغانستان اٹی اونا مشن پورو مسنے، ہدف آتا دوئی کننگ آن پد اوغانستان آن درملکی فوج انا پیش تمنگ سہی ءُ فیصلہ اس ئس۔ شاہ محمود قریشی نا پاننگ ئس کہ ہندوستان پاکستان اٹ نزوری خواہک۔ ہندوستان ننا برخلاف اوغان گل زمین ءِ کاریم اٹ ایس۔ ہرانا ناقابل تردید شاہدی تے نن دنیا نا مون آ تخان۔ انسانی حق انا پاسداری امتیازی بایدے مف۔ نن ڈیہہ ٹی امن و سوگوی نا خواہندار اُن، بھارت ننا امن نا است خواہی ٹی، کشمیر اٹی 5اگست 2019نا اسہ کنڈی گام گیج کرسا حالیت آتے پین ویل و ویچڑ کرے۔ وزیرخارجہ پارے کہ اوغان تا منجمد میرات آتے ملنگ آن اوغانستان ءِ انسانی تنکی آن کشنگ اٹ کمک رسینگک، جہانی برادری دانازرک تاریخی موڑ آ اوغان تے تنیا بایدے ہلپ۔ شاہ محمود قریشی پارے کہ پاکستان کابل آن چندی ملک آتا سفارتی عملہ و شاری تے رکھ کشنگ اٹ پبی کمک کرے ولے بدبختی اٹ پاکستان نا مثبت کوشست آتا قدر ءِ کننگتو۔
