وزیرخارجہ مخدوم شاہ محمود قریشی نا آئرش ہم منصب تون اوڑدہی

اسلام آباد، نیویارک۔ 22ستمبر (اے پی پی) وزیرخارجہ مخدوم شاہ محمود قریشی اوغان الس ءِ ممکنہ انسانی تنکی نا خطرہ غاتیان بچفنگ کن جہانی برادری نا کنڈآن انسانی کمکاری نا فراوانی ءِ پک کننگ آ زور شاغانے۔ دفترخارجہ نا کنڈآن جاری پریس ریلیز نا رداٹ وزیرخارجہ نیویارک اٹی اقوام متحدہ جنرل اسمبلی نا 76می دیوان نا وخت آ آئر لینڈ نا وزیر خارجہ ودفاع سائمن کوو تون اوڑدہی کرے۔ داوخت آ ہڑتوم آ وزیرخارجہ غاتا نیام اٹ ہڑتوم آ کنڈآتا تعلقداری، چندی بشخ آتے ٹی ہڑتوم آ کنڈآتا کمکاری نا مون آ دننگ و اوغانستان نا مون آ بروک آ حالیت آتیا گپ وتران کریر۔ وزیرخارجہ غاک اوغانستان نا ساڑی آ حالیت آتیا گپ وتران کرسا، اوغان الس ءِ ممکنہ انسانی تنکی نا خطرہ غان بچفنگ کن جہانی برادری نا کنڈآن انسانی کمکاری نا فراوانی ءِ پک کننگ آ زور شاغار۔ وزیرخارجہ پارے کہ آئر لینڈ یورپی یونین نا اہم ءُ ملک اسے۔ اوپارے کہ پاکستان، آئرلینڈ تون ہڑتوم آ کنڈآتا تعلقداری تے خاص اہمیت ایتک۔ مخدوم شاہ محمود قریشی پارے کہ آئرلینڈ اٹ بھلو کچ اسے ٹی رہینگوک آ پاکستانی کمیونٹی، ہڑتوم آ ملک آتا نیام اٹ تعلقداری نا سوگوی ٹی اسہ پول اسے نا کاریم ءِ کیک۔ وزیرخارجہ گچین وڑاٹ کورونا دین انا تالانی ءِ توننگ اٹ سرسہبی آ آئر لینڈ حکومت نا حکمت عملی و کوشست آتا ستاءِ کرے۔ داوخت آ ہڑتوم آ وزیرخارجہ غاک پاکستان و آئر لینڈ نا نیام اٹ ہڑتوم آ کنڈآتا سیاسی سلابتی میکنزم ءِ فعال کننگ و بڑزکو کہول انا رابطہ غاتے ودفنگ نا گرج آ زور شاغار۔ مخدوم شاہ محمود قریشی پارے کہ پاکستان و آئرلینڈ نانیام اٹ واپار، زرکاری، چاگڑد، جان جوڑی، قابل تجدید توانائی، کشت وکشار، سیل وسوات و ٹیکنالوجی نا بشخ آتے ٹی ہڑتوم آ کنڈآتا کمکاری ءِ ودفنگ نا بھلو وارخواہی اس ساڑی ءِ۔ اوجی ایس پی پلس اسٹیٹس نا بابت پاکستان نا مخ تفی آ آئر لینڈ نا سرکڑدہ غاتا منت واری ءِ ہرفے۔ وزیرخارجہ پاکستان اٹی دینی و سیکورٹی حالیت آتے ٹی گچینی ءِ مون آ تخسا، ٹریول ایڈوائزری آ نظرثانی نا گام انا ستاءِ کرے۔