اسلام آباد۔ 22ستمبر (اے پی پی) وزارت ڈٹ بندی، شونداری، اصلاحات و خصوصی گام گیج ملک اٹی جان جوڑی نا آسراتی تے گچین کننگ کن اولیتی بنداو تیا گام گیج کننگ ءِ، دا چرجوئی ٹی حکومت مچ آ ملک اٹی کوویڈ۔ 19اتون مون تننگ نا پروگرام نا پی سی ون نا رداٹ 37.96ارب روپئی نا ودکی گرانٹ جتا کرینے۔ پلاننگ کمیشن نا کمامدارآتارداٹ داگرانٹ ملک انا ہرچار آ صوبہ غاتے ٹی ضلعی و تحصیل ہیڈکوارٹرز ہسپتال آتے ٹی ناجوڑی و اوفتا اہم نگہداشت یونٹ آتیا خڑچ کننگک۔ داپروگرام نا رداٹ صوبہ خیبرپختونخوانا 19ڈسٹرکٹ ہیڈکوارٹرز ہسپتال آتا اپ گریڈیشن کن 5.02ارب روپئی، صوبہ سندھ انا 21ضلع غاتے ٹی 16ڈسٹرکٹ ہیڈکوارٹر ز ہسپتال و 23تحصیل ہیڈکوارٹرزآتیان بیدس 4ٹیچنگ ہسپتال آتے کن 10.41ارب روپئی، صوبہ پنجاب نا 11ضلع غاتا 6ڈسٹرکٹ ہیڈکوارٹرز و 8تحصیل ہیڈکوارٹرز ہسپتال آتے کن 19.59ارب روپئی، صوبہ بلوچستان اٹی ہسپتال آتا اپ گریڈیشن کن 2.94ارب روپئی، گلگت بلتستان اٹی 10ڈسٹرکٹ ہیڈکوارٹرز ہسپتال آتے اپ گریڈیشن کن 1.6ارب روپئی، آزاد کشمیر 10ڈسٹرکٹ ہیڈکوارٹرز، 10تحصیل ہیڈکوارٹرز ہسپتال و 4ٹیچنگ ہسپتال آتا اپ گریڈیشن کن 1.1ارب روپئی جتا کننگانے۔ سویلی بلوچستان نا پسماندہ ضلع غاتے ٹی جان جوڑی نا آسراتی تے پوسکن آ وڑوڈول آتیا اتنگ کن 4.87ارب روپئی نا ودکی گرانٹ خڑچ کننگک۔
